Haf 7

Jisas i Laef Bakegen, Go Kasem Taem We Pol i Kalabus

Jisas i ded, nao long namba tri dei blong hem, God i mekem hem i laef bakegen. Long dei ya, Jisas i kamtru long ol man blong hem long faef defren ples. Long ol 40 dei biaen, hem i kamtru long olgeta plante taem. Biaen, taem plante disaepol oli stap, hem i go antap long heven. Afta we ten dei i pas, God i sanem tabu spirit i kamdaon long ol man blong Jisas we oli stap wet long Jerusalem.

Ol enemi blong God oli sakem ol aposol long kalabus, be wan enjel i mekem olgeta oli gofri. Ol man blong agens oli stonem disaepol ya Steven i ded. Yumi luk we Jisas i jusumaot wan long ol man blong agens ya, blong i kam wan spesel man blong hem, hemia aposol Pol. Tri yia haf afta we Jisas i ded, God i sanem aposol Pita i go blong prij long man ya Konilias mo ol famle blong hem, we oli no man Isrel.

Samwe long 13 yia biaen, Pol i mekem faswan trip blong hem blong prij. Long seken trip blong hem, Timoti i folem hem. Yumi luk ol bigfala samting we oli hapen long Pol mo ol fren blong hem, taem oli stap mekem wok blong God. Afta we sam taem i pas, Pol i go kalabus long Rom blong tu yia. Hem i kamfri, be biaen, oli putum hem long kalabus bakegen mo oli kilim hem i ded. Haf SEVEN i tokbaot 32 yia blong histri mo ol samting ya we oli hapen long hem.