?Wanem Bambae i Hapen Long Wol Ya?
!Long olgeta ples blong wol, ol man oli harem nius evri dei blong ol bigfala trabol mo ol samting we i mekem olgeta oli sek nogud! ?Wanem mining blong ol trabol ya?
NO SEF: Bom i bosta long ples blong maket. Man i sutum tija mo sam studen i ded long skul. Man i stilim pikinini taem papa mama blong hem i no stap lukluk. Man i kilim mo i ravem olfala man no woman long delaet nomo.
OL SKUL: Ol skul oli sapotem pati blong politik long faet. Sam lida blong skul oli pas long kot from oli bin traem blong kilimaot wan ful laen blong man. Sam lida blong skul oli mekem rabis fasin long saed blong seks wetem ol yangfala; jos i haedem. Plante man oli no moa go long jos; ol lida blong jos oli gat tu fes, mo oli wantem mane nomo.
OL SAMTING RAONABAOT LONG YUMI: Ol bigfala kampani blong katem timba oli spolem dakbus blong winim bigfala mane. I no moa gat tri nating long sam ples from we ol man oli katemaot evriwan blong yusum olsem faeawud. Wota aninit long graon i doti tumas, i nogud blong dring. Ol man blong huk oli no moa kasem fis from i gat tumas doti long solwota mo from sam fasin blong huk tede we oli spolem ol fis. Win i doti from ol posen smok we i stap long hem.
WOK: Pei blong wan man long sam kantri long Afrika, i samting olsem 48,000 vatu long wan yia. Fasin griri blong ol bos blong ol big bisnes i mekem bisnes i foldaon, mo plante taosen man oli lusum wok blong olgeta from. Man i lusum olgeta mane we hem i winim taem hem i wok, from we narafala i trikim hem.
KAKAE I SOT: Samwe long 800 milian man long wol oli go slip evri naet we bel blong olgeta i emti.
FAET: Long ol yia 1900, bitim 100 milian man oli lusum laef blong olgeta long ol faet. I gat naf niuklia tul blong faet blong spolem olgeta man long wol bakegen mo bakegen. Ol man long semfala kantri nomo oli stap faetfaetem olgeta. Wok blong ol teroris i kasem olgeta ples blong wol.
SIK: Stat long yia 1918, sik ya Spanish flu i tekemaot laef blong 21 milian man. Tede AIDS i “kam bigwan moa i bitim olgeta sik long ol yia bifo.” Long olgeta ples blong wol, kansa mo sik blong hat i karem soasore i kam long fulap man.
Afta we yu ridim ol wanwan nius olsem, i gud blong traem tingting dip. ?Ol samting ya i hapen sam samtaem nomo mo long sam ples nomo? ?No oli stap hapen oltaem long olgeta ples blong wol? ?Wanem mining blong olgeta?
[Bokis/Foto blong pija long pej 5]
?God i Rili Kea?
Plante man we oli harem nogud from ol trabol long wol no from we oli lusum wan famle no olting blong olgeta, oli wantem save from wanem God i no blokem ol trabol ya.
God i kea. Hem i givim gudfala advaes blong lidim yumi mo blong givhan long yumi. (Matiu 11:28-30; 2 Timoti 3:16, 17) Hem i mekemrere ol plan blong hem finis blong tekemaot raf fasin, sik, mo ded blong olwe. Ol samting we hem i mekem blong givhan long yumi oli soemaot se hem i tingbaot ol man blong olgeta kantri, laen, mo lanwis, i no ol man blong wan kantri nomo.—Ol Wok 10:34, 35.
?Yu yu rili wantem we plan blong God i kamtru? ?Yu yu save hu i wokem heven mo wol? ?Wanem nem blong hem? ?Wanem plan blong hem? Hem i talem ansa blong ol kwestin ya long Baebol. Hem i talem wanem samting we hem i stap mekem blong finisim raf fasin wetem sik mo ded. ?Blong kasem blesing, yumi mas mekem wanem? Yumi mas kasem save long God mo plan blong hem. Sipos yumi wantem kasem blesing from ol samting we God i stap mekem, yumi mas gat bilif long hem. (Jon 3:16; Hibrus 11:6) Mo tu, yumi mas obei long ol tok blong hem. (1 Jon 5:3) ?Yu yu rili wantem we plan blong God i kamtru? Sipos yes, bambae yu glad blong obei long hem.
Blong kasem save from wanem God i letem ol trabol i stap, yumi mas kasem save long wan bigfala samting we i hapen long taem bifo. Baebol i eksplenem wanem i bin hapen. Long pej 15 blong buk ya, bambae yu kasem moa save long saed ya.