Merikel Long Red Si

Taem Fero i harem se ol man Isrel oli lego Ijip, hem i jenisim tingting blong hem bakegen. Nao hem i talem long ol soldia blong hem se: ‘!Yufala i mekemrere ol kat blong faet, bae yumi biaen long olgeta! Yumi no sud letem olgeta oli go.’ Nao hem wetem ol ami blong hem oli biaen long ol man Isrel.

Jehova i lidim ol man blong hem. Long dei, hem i yusum wan klaod, mo long naet, bigfala faea i go fastaem long olgeta. Hem i lidim olgeta oli go kasem Red Si, mo oli mekem kamp blong olgeta long ples ya.

Nao ol man Isrel oli luk we Fero mo ol ami blong hem oli biaen long olgeta. I olsem se oli stap long wan trap, from we Red Si i stap long fored blong olgeta mo ol ami blong Ijip oli stap biaen. Nao oli krae long Moses se: ‘!Bae yumi ded! ?From wanem yu tekemaot mifala long Ijip?’ Be Moses i talem se: ‘!Yufala i no fraet! !Yufala i stanap strong! Bae yumi luk we Jehova i sevem yumi.’ ?Yu ting se Moses i trastem Jehova?

Nao Jehova i talem long ol man Isrel blong oli muvaot. Long naet ya, Jehova i mekem se klaod we i stap long fored blong ol man Isrel i muv i go stap biaen long olgeta, bitwin long olgeta mo ol man Ijip. Long saed we ol man Ijip oli stap long hem, ples i tudak olgeta, be Jehova i givim laet long ol man Isrel.

Nao Jehova i talem long Moses blong i stretem han blong hem antap long Red Si. Ale Jehova i mekem wan win i blu strong long fulnaet. Nao solwota i seraot long tu haf, mo ples long medel blong tufala solwota ya i kam drae. Plante milian man Isrel i wokbaot long drae graon long medel blong tufala solwota ya, go kasem narasaed.

Fero mo ol ami blong hem oli biaen long ol man Isrel ya. Nao Jehova i mekem olgeta oli lusum hed, mo ol wil blong ol kat blong faet oli kamkamaot. Ol soldia oli singaot strong se: ‘!Yumi kamaot! Jehova i stap long saed blong olgeta, i stap faet agensem yumi.’

Jehova i talem long Moses se: ‘Yu stretem han blong yu bakegen antap long Red Si.’ Nao wantaem nomo, bigfala solwota i kambak, i kavremap ol ami blong Ijip. Fero mo ol soldia blong hem oli ded. I no gat wan long olgeta we i laef.

Taem oli kamtru long narasaed blong Red Si, bigfala hip blong ol man blong God oli singsing blong presem hem, se: “I gud mi singsing long Jehova, from we hem i winim faet mo i leftemap nem blong hem i go antap. Hos mo man we i ron long hos, hem i sakem tufala i go long solwota.” Taem oli singsing, ol woman oli plei long ol tamborin, mo oli danis. Evriwan oli glad tumas from we oli fri.