Fastok
?BUK YA I BLONG WANEM?
Jehova God i talem long ol man blong hem se oli mas “traehad blong faenem” save mo blong haremsave mining blong ol strong samting, olsem we oli traehad blong faenem “silva, no wan narafala samting olsem, we man i bin berem.” (Prov. 2:1-5) Hemia i min se yumi mas traehad blong faenem ansa blong ol kwestin we yumi gat long Baebol, mo blong faenem advaes we i save givhan long yumi blong winim ol wari blong laef. Buk Blong Mekem Risej i blong givhan long yu blong yu faenem save ya.
Long buk ya, i no gat evri topik we ol buk blong yumi oli tokbaot. Be aninit long ol topik we oli stap, i gat sam buk we yu save lukluk long olgeta, blong faenem save we oli tanem i kam long lanwis blong yu, speseli afta long yia 2000.
?YU MEKEM RISEJ OLSEM WANEM?
Yu lukluk long Ol Save Insaed we i stap long nekis pej. Nao yu jusum wan topik we yu ting se hem i tokbaot ol save we yu wantem. Maet yu mas lukluk plante topik blong faenem stret save we yu stap lukaotem. Ol smol stamba tok we oli stap aninit long ol topik, oli save givhan long yu blong faenem save we yu yu wantem.
Taem yu jusum wan topik finis, yu openem buk ya long stret pej blong topik ya, mo yu lukaotem smol stamba tok we yu wantem. Bambae yu luk nem blong sam haf blong magasin no japta blong wan buk. Yu jusum olgeta we yu wantem ridim. Sipos yu gat ol buk mo magasin long haos no long kompiuta no long laebri long Haos Kingdom, yu save faenem stret japta no haf ya. Yu mas tingbaot se maet nem blong japta i no tokbaot kwestin blong yu, be insaed long japta ya, bambae i gat ol save we i stret long kwestin ya. Mo tu, long ol las pej blong buk ya, i gat wan lis blong ol save, we i stat long A i go kasem Z.
Yu no mas fogetem se, i olsem we yu stap traem faenem “silva, no wan narafala samting olsem, we man i bin berem.” Taswe, bambae i tekem taem, mo yu mas traehad. Yu mas gat longfala tingting blong faenem stret ansa no advaes we yu stap lukaotem. Yu mas yusum Buk Blong Mekem Risej oltaem, olsem nao, bambae i kam isi moa blong yu faenem ol save. Bambae yu harem gud tu, mo bambae Jehova i blesem yu from we yu traehad. Bambae hem i givhan long yu blong yu faenem save mo yu haremsave mining blong ol strong samting.—Prov. 2:6; 4:5.
MINING BLONG OL SAEN YA:
❐ = Sam haf blong wan magasin we evriwan oli tokbaot sem samting
✎ = Ol kwestin blong stadi long ol DVD
§ = Smol stamba tok
¶ = Paragraf
jap. = Japta
p. no pp. = Pej no ol pej
12/2004 = Manis/Yia
1/2/2010 = Dei/Manis/Yia
Wajtaoa, br1 2007 = Wan magasin we i kamaot afta long Wajtaoa blong 15 Disemba 2007, mo bifo long Wajtaoa blong 1 Jenuware 2008. I gat ol haf blong stadi long hem.
I gat “Ol Save We Yu Faenem Long Buk Ya” long en blong:
Tiokratik Skul i Save Givhan Long Yu Long Wok Blong God