Profet Tok i Kamtru
TAEM ol disaepol blong Jisas Kraes oli askem saen we bambae i soemaot se hem i stap finis long Kingdom paoa, Jisas i bin talem we “bambae ol fasin nogud oli kam bigfala moa.” (Matyu 24:3, 12) ?Profet tok ya i kamtru long taem blong yumi?
!Yes, hem i kamtru! Buk ya The United Nations and Crime Prevention, we Yunaeted Nesen i wokem long Oktoba 1991, i talem se: “Nogud fasin blong brekem loa i wan bigfala trabol long plante kantri blong wol. Fasin blong brekem loa long wanwan kantri i bitim mak, ol nesen ya wanwan oli no naf blong blokem mo fasin blong brekem loa i spid i go bitim mak blong ol bigfala sosaeti blong olgeta. . . . Fasin blong brekem loa, we ol grup blong ol man blong brekem loa oli stap stanemap i stap gru bigwan, wetem ol nogud samting we oli kamaot from, long saed blong faet, fosem mo mekem ol haeman oli gat kruked fasin. Ol rebol oli kilim ded plante taosen man blong nating nomo. Ol man we oli stap salem ol drag long ol narafala man oli mekem bigfala trabol long fulwol. Fasin blong spolem ples we i stap raonabaot long yumi i bitim mak mekem se ol man oli luksave samting ya olsem wan trabol we ol man oli mekem long wol ya.”
Ol faet: Namba i gru long 150 faet long 100,000 man long 1970 i go kolosap i kasem 400 faet long 100,000 man long 1990.
Fasin blong stil: Fasin ya i gru i bitim 1,000 stil long evri 100,000 man long 1970 go kasem 3,500 stil long evri 100,000 man long 1990.
Fasin blong kilim man i ded: Long ol pua kantri, namba i stap gru olsem 1 go kasem 2.5 man long evri 100,000 man stat long 1975 go kasem 1985. Long ol rij kantri namba i stap gru long sem taem ya i kolosap long 3 man go kasem bitim 3.5 man.
Fasin blong brekem loa we i joen long drag: Buk ya i talem se: “Olgeta nogud grup blong salem ol drag oli save stilim no oli winim ol gavman blong ol smol kantri, mo naoia oli save spolem loa mo ol rul we ol rij kantri oli putum blong daonem fasin ya.”
Namba blong olgeta fasin blong brekem loa: Oli ting se long yia 2000, namba bambae i go kolosap long 8,000 long evri 100,000 man, hemia tu taem antap moa long 4,000 long evri 100,000 man long 1985.
Fasin blong brekem loa we i stap kam antap long olgeta ples long wol i wan saen nomo long profet tok blong Jisas blong soem se yumi stap laef kolosap long taem we bambae “wol ya i finis.” (Matyu 24:3) Jisas i talem se: “Taem yufala i luk we ol samting ya oli kamtru, bambae yufala i save se [kingdom blong God, NW], bambae i no longtaem hem i kamtru.”—Luk 21:31.