Wan Fasin Naes We i No Save Lus

WALTER De la Mare we hem i wan man blong raetem ol gudfala toktok i talem se “Fasin naes i lus, fasin naes bambae i go.” Samting ya i tru wetem ol naes flaoa blong Cactaceae we pija blong hem i stap long ples ya. Fasin naes blong olgeta i lus kwiktaem.

Kristin disaepol Jemes i raetem se: “Rijman i olsem flaoa blong burao. Taem san i kam antap, we i hot tumas, bambae i bonem ol flaoa ya oli kam drae, oli foldaon. Nao gudfala kala blong olgeta i lus. Mo long sem fasin nomo, long taem we ol rijman oli stap wokem ol bisnes blong olgeta yet, be bambae oli lus.”​—Jemes 1:​10, 11.

Long wol ya we i stap jenis, rij samting i save lus long wan naet. Antap moa, ol rijman​—olsem evriwan​—‘laef blong hem i sot nomo, olsem flaoa blong wan tri.’ (Job 14:​1, 2) Jisas i talem wan parabol long saed blong wan man we i bin stap bisi blong hivimap ol sas samting mekem se bambae hem i save spel mo i stap haremgud. Be taem hem i stap tingting se hem i gat evri samting blong haremgud long laef, hem i ded. Jisas i givim woning se: “Bambae i mas olsem nomo long olgeta man we oli stap hivimap plante samting we oli blong olgeta nomo, be long fes blong God oli no rijman nating.”​—Luk 12:​16-21.

‘Rijman long fes blong God.’ ?Tok ya blong Jisas i minim wanem? Wan rijman olsem i hivimap ‘ol gudgudfala samting long heven’​—wan gudfala nem wetem God. Gudfala samting olsem i no save lus. (Matyu 6:20; Hibrus 6:10) Man olsem i stap olsem flaoa we i no save drae, Baebol i talem se hem i olsem wan tri, we ol lif blong hem oli no save drae. Mo, Baebol i promes se, “ol man ya tu oli stap win long evri samting we oli stap mekem.”​—Ol Sam 1:​1-3, 6.