Ripot Long Wok Blong Kingdom
Hem i Folem Voes Blong Hat Mo Tingting Blong Hem We Baebol i Trenem
DEVED, king blong Isrel, i prea from help blong Jeova taem hem i talem se: “Mi mi stap mekem ol samting we i stret nomo. Plis yu sore long mi, yu sevem mi.” (Ol Sam 26:11) God i sore long hem from we hem i stap mekem ol samting we i stret nomo. Jeova i blesem Jisas tu from we Jisas i mekem wil blong Papa blong hem we i stap long heven, mo Jeova i blesem wan yangfala long Kolombia we i folem voes blong hat mo tingting blong hem we Baebol i trenem, mo hem i gat strong tingting blong mekem wil blong God. Yangfala man ya i talem se:
“Taem mi stat stadi Baebol wetem ol Wetnes blong Jeova, mi mi wan studen blong wan Katolik skul. Be, voes blong hat mo tingting blong mi i stikim mi taem mi go long Lames, ale mi go long hed tija blong skul (we hem i wan pris), mo man blong givim advaes blong soem stret rod blong folem, mo man we i lukaot long grup blong mifala, mo mi askem olgeta blong mi no moa go long Lames. Nating se oli agri blong mi no moa go, sam man oli traem blong fosem mi blong go. Fasin ya blong fosem mi i kam strong moa taem we mi baptaes finis olsem wan Wetnes blong Jeova. Papa blong mi i talem se bambae hem i sanemaot mi long haos sipos oli sakemaot mi long skul. Tingting blong hem se mi mas go skul long yunivesiti mo biaen kasem wan gudfala wok.
“Plante taem, hed tija i givim woning long saed blong eniman we i no folem ol rul blong Katolik. Long stret taem blong faswan Lames blong yia, mi haed gogo Lames i finis. Biaen mi givim wan kopi blong buklet ya School and Jehovah’s Witnesses long tija (wan pris) mo mi talem long hem se, mi wan Wetnes blong Jeova, taswe mi no save go long Lames. Hem i talem se: ‘Yu mas stat blong lukaot wan narafala ples blong go skul long hem.’ Mi save se sipos oli sakemaot mi long skul, samting ya i min se papa blong mi bambae i sakemaot mi long haos. Nating se i olsem, mi mi prea long Jeova mo mi gohed strong blong givim wetnes long ol fren blong mi long skul.
“Taem blong spel i kam. Ale skul i stat bakegen afta long spel, mo i taem blong go long Lames bakegen. Hed tija mo ol narafala pris, oli stap afsaed long jyos, oli stap rere blong lesin long ol man we oli kam blong talemaot ol sin blong olgeta. Kolosap fraet i winim mi. Mi go insaed mo mi sidaon, be voes blong hat mo tingting blong mi i stikim mi. Taem singsing i stat, wan tingting i kam long mi se, ‘?Mi stap mekem wanem long ples ya? Jeova i God blong mi. Mi no save fraet mo gyaman long hem. Mi no save lego hem. Bambae hem i no save lego mi.’ Mi prea blong askem hem blong givim paoa long mi. Ale, mi go afsaed mo mi stanap long laen blong ol man we oli stap go blong talemaot sin blong olgeta. Taem mi go kasem hed tija, mi talem long hem se: ‘Tija, mi mi no kam blong talemaot sin blong mi.’ Hem i talem se: ‘Mi tingting olsem.’ Mi talem long hem se mi mi rere blong harem nogud from ol frut we oli save kamaot from samting ya, be voes blong hat mo tingting blong mi i no letem mi blong joen long Lames. Mi no save mekem samting ya we i agensem ol samting we mi lanem long Baebol.
“Hem i lukluk strong long mi, i smael, mo i talem se: ‘Mi respektem yu. I stret nomo blong ol man oli respektem yufala ol Wetnes. Long tingting blong yufala, yufala i putum God fastaem, mo yufala i rere blong obei long ol loa blong hem, nomata wanem samting i hapen long yufala. Gohed blong mekem samting ya. Yu stap mekem i gud tumas. Mi wantem se olgeta Katolik bambae oli kam olsem yufala, blong soemaot fasin blong holem strong mo fasin blong laekem God olsem. Stat naoia, yu no moa joen long ol sevis blong skul blong mifala.’ !Mi mi glad tumas! Jeova i blesem strong tingting we mi gat blong obei long voes blong hat mo tingting blong mi we Baebol i trenem.
“Long nekis dei, hed tija i talem long ol studen se: ‘Sam narafala jyos oli bitim yumi. ?From wanem yumi no olsem olgeta, yumi mekem wok blong God wetem strong tingting, dip lav long God mo fasin blong wantem tumas blong mekem wok blong hem bitim ol narafala wok? Hemia nao samting we i mas stap long hat blong yumi.’
“Biaen, oli sanem hed tija ya i go long Rom, mo nyufala hed tija i no moa wari long fasin blong mi blong no joen long Lames. Papa blong mi i aot long haos, mekem se mi mi fri blong kasem mak blong mi blong kam wan fultaem Kristin minista taem mi finis long skul.”
Jeova i blesem yangfala man ya we i folem voes blong hat mo tingting blong hem we Baebol i trenem. Long sem fasin, bambae Jeova i blesem olgeta we oli stap traehad blong mekem wil blong hem.—Proveb 3:5, 6.