“Oli Save Voes Blong Hem”
‘JEOVA i stap lukaot mi, olsem we mi mi sipsip blong hem.’ Hemia ol faswan tok blong Ol Sam 23. Baebol i talem bakegen se Jeova God i olsem wan man blong lukaot long sipsip, long profet tok blong Aesea, we i talem se: “Olsem wan man blong lukaot long sipsip, God i stap lukaot long ol man blong hem. Wetem han blong hem, hem i hivimap ol smol sipsip blong hem, mo hem i holem olgeta kolosap long hem. Bambae hem i lukaot gud long olgeta we oli gat pikinini we oli stap titi.”—Aesea 40:11.
Sem mak, Jisas Kraes i olsem wan man blong lukaot long sipsip. Hem i talem se: “Gudfala man ya blong lukaot long sipsip, mi ya. Gudfala man blong lukaot long sipsip, hem i save givim laef blong hem blong sevem ol sipsip blong hem.” (Jon 10:11) Jisas i talem se “ol sipsip oli save harem voes blong [man blong lukaot long sipsip]. Hem i save singaot ol sipsip blong hem wanwan long nem blong olgeta, nao i save lidim olgeta oli go afsaed.” Hem i ademap se “[man blong lukaot long sipsip] i save go fastaem mo ol sipsip ya oli save kam biaen long hem, from we oli save voes blong hem. Be oli no save biaen long wan strenja, oli mas ronwe long hem, from we oli no save voes blong ol strenja.”—Jon 10:2-5.
Jeova God mo Pikinini blong hem, Jisas Kraes, tufala tugeta i stap folem ol fasin we ol vas ya oli tokbaot. Tufala i lukaot ol man we oli olsem sipsip blong olgeta wetem fasin we i no strong mo kea long olgeta wetem lav. Taswe, olgeta ya we oli olsem sipsip oli harem se tufala i laekem olgeta tumas, oli no fraet mo oli sef.
I tru we fasin fren ya i olsem fasin fren bitwin ol trufala sipsip wetem man blong lukaot long olgeta. Long 1831, John Hartley i raetemdaon ol samting we hem i luk long saed ya. Hem i luk we long Gris i wan kastom blong ol man blong lukaot long sipsip, blong givim nem long ol sipsip blong olgeta. Taem oli singaotem olgeta long nem, ol sipsip ya bambae oli lesin long voes blong man blong lukaot long sipsip. Long 1882, 51 yia biaen, J. L. Porter i raetemdaon ol samting we hem i luk we oli kolosap sem mak. Hem wan i luk sam man blong lukaot long sipsip we “oli stap singaot . . . long wan spesel fasin wetem voes we i antap olgeta,” ale ol sipsip oli stap lesin long olgeta mo oli stap obei taem oli folem ol man ya blong lukaot long sipsip. Long sem yia ya, William M. Thomson i raet blong tokbaot stadi we oli mekem plante taem bakegen we i pruvum se man blong lukaot long sipsip i save tijim ol sipsip blong folem hem mo blong haremsave voes blong hem.
?Ol man long taem blong yumi oli bin luk spesel fasin fren ya bitwin ol man blong lukaot long sipsip mo ol sipsip blong olgeta? Yes. Long National Geographic long Septemba 1993, man Ostrelya, Robyn Davidson we i laekem blong go long ol ples we oli defren, i raetem samting ya long saed blong ol Rabari, grup blong ol man long not-wes India we oli laef long ol kamp blong lukaot long ol anamol blong olgeta: “Wanwan long ol man ya blong lukaot long sipsip oli gat defren fasin blong singaot, olsem wan singsing wetem ol defren fasin blong singsing long hem. I gat wan fasin blong singaot long moning blong oli go aot, wan fasin blong singaot blong karem ol sipsip oli go long wora, mo i gohed olsem. Wanwan man i save ol sipsip blong hem mo ol sipsip wanwan oli save man blong lukaot long olgeta, mo ol sipsip blong wan man bambae oli seraot long bigfala grup blong ol narafala sipsip mo biaen long man ya long moning.”
I klia se, Jisas i luk samting we fofala man ya blong wokbaot oli jes tokbaot. Ol samting we hem wan i bin luk i mekem pijatok blong hem long saed blong ol sipsip we oli haremsave voes blong hem i kam wan trufala samting. ?Yu yu wan long ol sipsip blong Jisas? ?Yu yu save voes blong hem mo yu stap lesin long hem? Sipos yu luksave mo agri se ol tijing blong hem oli trutok mo sipos yu obei long ol oda blong hem mo folem hem taem i lidim yu long wosip blong Jeova, ale yu save haremsave lav mo kaengud fasin blong Jeova God mo Pikinini blong hem, Jisas Kraes taem tufala i stap lukaotgud long yu.—Jon 15:10.