“Ol Rus We i No Gat Samting i Save Muvmufum Olgeta”
WAN long ol bigfala mo ol olfala laef samting bitim ol narafala samting long wol hemia ol bigbigfala tri sekoya blong Kalifonia. Ol bigbigfala tri ya we oli mekem man i sapraes oli save kasem 90 mita hae taem oli gru fulwan mo oli save laef kasem 3,000 yia.
Nating se lukluk blong bigfala tri ya sekoya i bigwan we i mekem man i fraet, rus blong hem we yumi no save luk i sem mak. Ol rus blong bigfala tri ya sekoya oli flat olsem mat, oli save kavremap wan bigfala ples olsem 1.2 kasem 1.6 hekta. Bigfala rus ya oli olsem wan gudfala angka blong tri ya taem i gat bigfala wora i ron mo win. !Bigfala tri ya sekoya i naf blong stanap strong taem graon i seksek bigwan!
King Solomon i yusum fasin blong rus blong tri we i strong olsem wan pijatok long wan waes tok blong hem. Hem i talem se, “I no gat man i save stanap strong long fasin nogud, be ol gudfala man oli gat ol rus we i no gat samting i save muvmufum olgeta.” (Proveb 12:3, The New English Bible) Yes, ol rabis man oli no save stanap strong longtaem. Oli save kam strong be i blong smoltaem nomo, from we Jeova i promes se “hop blong ol rabis man bambae i finis.”—Proveb 10:28.
Hemia i wan woning blong olgeta we oli stap talem se oli Kristin, from we Jisas i talem se sam bambae oli no gat “rus” blong olgeta mo bambae oli foldaon. (Matyu 13:21) Antap moa, aposol Pol i raet long saed blong ol man we gyaman tijing i save tantanem olgeta “olsem kenu we solwora i save sakem i go olbaot, win i save tekem i go.” (Efesas 4:14) ?Olsem wanem yumi save blokem samting ya?
Bigfala tri ya sekoya i mekem ol rus blong hem oli go olbaot long graon we i stap givim kakae long hem, taswe tingting mo hat blong yumi i nidim blong go dip moa long Tok blong God mo pulumaot wora blong laef we hem i stap givim. Samting ya bambae i halpem yumi blong wokem wan bilif we i gat strong rus. Yes i tru, bambae yumi harem nogud long ol traem we oli olsem wan strong win. Maet yumi save seksek, olsem wan tri, taem yumi kasem trabol. Be sipos bilif blong yumi i stanap strong, bambae yumi pruvum se yumi gat “ol rus we i no gat samting i save muvmufum olgeta.”—Skelem wetem Hibrus 6:19.