“!Mi Neva Luk Wan Samting Olsem!”

LONG 1993, oli askem ofis blong Watch Tower Society long Ajentina blong sanem wan taosen brata sista oli go long Santiago, Jili, blong joen long fo dei “Tijing Blong God” Distrik Asembli blong ol Wetnes blong Jeova. Hemia i faswan taem we oli askem ol Wetnes blong Ajentina blong mekem wan trep long wan bigfala grup, blong go long wan asembli long narafala kantri.a ?Oli ansa olsem wanem? Bitim 8,500 man oli givim nem blong olgeta, we long olgeta ya, oli jusum 1,039 brata mo sista.

Oli jataremb 14 bas blong mekem trep ya blong 1,400 kilomita, stat long Buenos Aeres kasem Santiago. Trep ya we i tekem 26 haoa i gud moa from ol naesfala ples we ol pasenja oli save lukluk. Taem ol pasenja oli krosem ol Hil blong Andes, oli pas kolosap long Akonkagua, we i gat 6,960 mita, wan hil we i hae moa bitim ol narafala hil long Wes blong Wol. Samting we man i no save fogetem, hemia klif blong hil ya, we rod mo i gat plante kona long rod we i pas long hem, i godaon long Jili. !Ol pasenja oli singsingaot, oli talem tangkyu long ol draeva, from gudfala fasin blong olgeta blong draevem ol bas long rod ya we i denja tumas!

Be, samting we i naes tumas blong luk, we i bitim ol narafala samting, hemia asembli. Long wan wol we ol nesen oli seraot mo oli stap faet from kala blong skin, i gud tumas blong luk wan bigfala hif blong man we namba blong olgeta i kasem 80,000, mo oli kamaot long 24 kantri, oli stap joengud tugeta​—!i rili wan kampani blong ol brata raonabaot long wol! Taem sam long ol draeva blong bas oli luk fasin joen blong ol man we oli kam long asembli, oli talem se oli wantem save moa long saed blong ol Wetnes blong Jeova. Wan long olgeta i talem se: “!Mi neva luk wan samting olsem!”

[Ol futnot]