?Oli Kasem Paoa Weples?

SIPOS yu luklukgud long bataflae we i stap long pija ya, bambae yu luk se hem i no save yusum wan long ol fo wing blong hem. Nating se i olsem, bataflae ya i stap faenem kakae mo i stap flae. I no bataflae ya nomo we i olsem. Ol man oli bin luk ol bataflae oli stap mekem wok blong olgeta, we 70 pesen blong wing blong olgeta i lus finis.

Plante man tu oli soem strong tingting olsem. Nating se oli kasem bigfala problem long saed blong bodi mo filing, tingting blong olgeta i no foldaon.​—⁠Skelem wetem 2 Korin 4:16.

Aposol Pol i stanap strong tru long ol bigfala trabol, taem hem i stap mekem ol misinari trep blong hem. Oli wipim hem, oli kilim hem, oli stonem hem, mo oli putum hem long kalabus. Antap long samting ya, hem i gat wan sik, maet hemia wan trabol wetem ae blong hem, we i mekem hem i harem ‘olsem we nil blong aranis i stap stikim hem.’​—⁠2 Korin 12:​7-9; Galesia 4:15.

Blong plante yia, David, wan Kristin elda, i traem blong winim tingting we i foldaon olgeta. Hem i bilif se paoa blong Jeova i bigfala samting we i givhan long hem blong winim. Hem i eksplenem se: “Plante taem, mi traehad gogo mi winim smol, be biaen mi foldaon bakegen. Taem tingting blong mi i foldaon olsem, mi putum mi fulwan long han blong Jeova, mo i tru se, hem i rili givhan long mi. Samtaem, mi mi spenem plante haoa blong prea. Taem mi toktok long Jeova, ol filing ya se mi no gat fren mo se mi no naf blong mekem wan gudfala samting, oli lus. Plante taem mi bin harem se mi slak tumas, be mi talem tangkyu tumas long Jeova we hem i yusum traem ya blong mekem mi mi kam wan man we i strong moa​—⁠mo tu, we i strong inaf blong givhan long ol narafala.”

Jeova God i givim paoa long Pol. From samting ya, hem i save talem se: “Taem mi mi no gat paoa blong mi, long taem ya nao, mi mi gat paoa.” (2 Korin 12:10) Yes, ol slak fasin blong Pol, oli tijim hem blong dipen long paoa we God i givim. Hem i talem se: “Mi save mekem evri samting, long paoa blong Kraes ya we i stap mekem mi mi strong.” (Filipae 4:13) Yes, Jeova i stap givim paoa long ol man blong hem.