“!Jeova i Ansarem Prea Blong Mi!”

LONG olgeta ples blong wol, ol Wetnes blong Jeova oli stap mekem Baebol stadi wetem kolosap faef milyan man long haos blong olgeta. Ol man ya oli wantem kasem stret save long saed blong God mo nambawan tingting we hem i gat long saed blong fyuja blong ol man. Ol pikinini blong ol Wetnes blong Jeova tu oli joen long wok ya. Tingbaot wan smol boe we nem blong hem Joel. Hem i givim laef blong hem i go long Jeova mo tekem baptaes taem hem i gat naen yia nomo. Wan yia biaen, samting ya i hapen long hem:

“Taem mi stap prij, mi mitim wan woman we nem blong hem Candy. Mi soem buk ya long hem ‘Look! I Am Making All Things New.’ Be, hem i gat buk ya finis, taswe mi soem narafala buk ya Yu Save Laef Foreva Long Paradaes Long Wol, long hem. Be, hem i gat buk ya tu. Ale mi tingting se, ‘Bambae mi askem woman ya sipos hem i wantem mekem wan Baebol stadi.’ !Hem i agri!

“Sista blong Candy, we i sik tumas from kansa, i kam stap wetem hem. Antap long samting ya, Candy i stap tren blong kam wan nes. Taswe, hem i stopem stadi blong hem long Baebol blong smoltaem. Be mi mo papa mama blong mi, mifala i stap go luk hem oltaem, mo givim ol Wajtaoa mo Wekap! long hem no long hasban blong hem, Dick. Man ya i talem long mifala se Candy i stap putum ol magasin ya kolosap long bed blong hem mo i stap ridim long naet.

“Biaen, sista blong Candy i ded. Mi wetem Papa mo Mama, mifala i storeyan wetem Candy blong eksplenem wanem i hapen long man taem hem i ded. Hem i talem se hem i wantem statem Baebol stadi blong hem bakegen. Long wan narafala dei, mifala i askem long Dick sipos hem tu i wantem stadi, olsem we hem mo Candy tufala i mekem wan famle stadi. Hem i agri se hemia wan gudfala samting. Taswe naoia, mi wetem Papa blong mi, mitufala i stap stadi wetem Dick mo Candy tugeta. Tufala i stap gohedgud mo tufala i stap talem se tufala i glad tumas blong stadi Baebol.

“!Mi bin prea blong kasem wan Baebol stadi, mo Jeova i ansarem prea blong mi!”