?Hu i Stap Rulum Wol?
“?HU I stap rulum wol?” Sipos wan man i askem kwestin ya long yu, ?bambae yu ansa olsem wanem? Plante man blong jyos, bambae oli ansa se “God” no “Jisas.” Wan store long nyuspepa blong Bahamas, The Freeport News, i givim wan ansa we bighaf blong ol man oli sapraes long hem.
Hemia we i raetem store ya i talem se: “Mi faenem wan smol pepa kolosap long doa blong haos blong mi. Oltaem, mi sakem ol pepa we mi faenem long doa blong mi, be mi ridim pepa ya. Ol toktok long fored blong pepa ya i askem se, ‘?Hu i Rili Rulum Wol?’ ” Taem woman ya i ridim pepa ya we i stanap long Baebol, hem i kasem save se man we i rulum wol ya, i no God no Jisas, be hem i Setan.—Jon 12:31; 14:30; 16:11; 1 Jon 5:19.
Smol pepa ya i eksplenem se: “Tingbaot ol nogud fasin blong kilim man i ded. Ol man oli bin yusum posen gas, ol rabis kalabus, ol masket we oli sutum faea, ol faea bom, mo ol narafala fasin blong kilim man i ded, mo blong mekem man i harem nogud we i no gat sore nating. . . . ?Wanem paoa i pusum ol man blong mekem ol nogud fasin olsem, no i pulum olgeta gogo oli harem se oli mas mekem samting we i nogud olgeta? ?Samtaem yu stap tingbaot sipos i gat wan rabis paoa we man i no save luk, i stap pulum ol man blong mekem ol raf fasin ya?” ?Yu yu sapraes we Baebol i kolem Setan se “god blong wol ya?”—2 Korin 4:4.
Yumi glad se, kolosap nao bambae Setan mo ol rabis enjel blong hem oli lus. “Wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem i stap we bambae i no save lus samtaem.” (1 Jon 2:17) Yes, Baebol i promes se ol man we oli stap mekem samting we God i wantem, oli gat hop blong laef foreva long nyufala wol we i gat stret fasin. (Ol Sam 37:9-11; 2 Pita 3:13; Revelesen 21:3, 4) !Bambae yumi haremgud tumas taem i no moa gat paoa blong Setan mo ol rabis enjel blong hem i stap!
Woman we i raetem haf ya long The Freeport News i tokbaot ol bigfala poen long smol pepa ya, nao hem i finisim tok blong hem olsem: “Mi mi glad tumas blong ridim smol pepa ya . . . from we mi tu mi bin stap wari long ol samting we oli stap kamaot long wol, mo se hu i stap rulum hem.”