?Yu Save Trastem Promes Blong Hu?
LONG 1893, wan grup blong 74 man we oli storeyan long saed blong laef blong ol man, oli hivap long Wol Maket long Jikago, blong tokbaot fyuja. (Yumi save luk ples ya antap.) Oli lukluk i go wan handred yia long fyuja go kasem 1993, mo oli talemaot sam samting we bambae oli kamaot long ol yia ya: “Plante man bambae oli laef go kasem 150 yia. Bambae i no moa gat plante kalabus, mo ol man oli no moa nidim divos. Bambae gavman i kam isi moa, from we trufala fasin blong kam hae moa, oltaem i joen wetem fasin blong kam isi moa.”
Sem mak nao, long 1967, buk ya The Year 2000, i talem se: “Long yia 2000, bambae ol kompyuta oli save mekem olsem ol man, no oli save bitim ol man. Bambae oli gat save ‘olsem man,’ mo maet oli save mekem ol naes samting we man i naf blong wokem wetem han blong hem.” “I stret blong tingting se long yia 2000, . . . ol robot we oli no sas tumas, bambae oli mekem bighaf blong ol wok long haos.”
Fasin we man i no naf blong talemaot fyuja, i defren olgeta long fasin blong God. Eksampel, skelem ol tok antap wetem ol tok we Baebol i talem finis samwe long tu taosen yia i pas, long saed blong taem blong yumi. Hem i se: “Bambae ol man oli save tingbaot olgeta nomo, mo bambae oli wantem mane tumas. Bambae oli man blong tok flas, we tingting blong olgeta i go antap tumas, mo oli save tok nogud long ol man. Bambae oli no save ona long papa mo mama blong olgeta, oli no man blong talem tangkyu, mo oli no save tingbaot God. Bambae oli no man blong sore, oli man blong mekem i strong tumas oltaem long ol narafala man. Bambae oli man blong spolem nem blong narafala man, mo oli man blong lusum hed, mo oli wael olgeta. Bambae oli no wantem ol fasin ya we i gud nomo, oli agens long hem. Bambae oli man blong spolem ol fren blong olgeta, oli man we oli no kea, we flas i mekem tingting blong olgeta i lus. Bambae oli man we oli wantem tumas ol samting we oli stap harem gud long hem, i winim we oli stap laekem God. Long fes blong ol man, bambae olgeta oli stap folem fasin blong Kristin man, be oli no wantem paoa blong God nating long laef blong olgeta.”—2 Timote 3:1-5.
Profet tok ya blong Baebol long saed blong ‘ol las dei,’ i wan long plante profet tok we oli kamtru long taem blong yumi. Tok blong God i talem finis se ol samting olsem faet long fulwol, man i sot long kakae, ol strong sik, graon i seksek, mo gud nyus blong Kingdom blong God i kasem fulwol, bambae oli mekemap wan “saen” blong soem se Jisas i stap bakegen.—Matyu 24:3-14; Luk 21:11.
Ol promes blong God oli stret oltaem, oli no save mestem. Samting ya i pusum wan man we i raetem haf blong Baebol, blong talem plante handred yia bifo, se: “Long olgeta gudfala tok we Jeova, God blong yufala i talem long yufala, i no gat wan tok we i mestem. Olgeta oli kamtru finis long yufala. I no gat wan tok nating we i mestem.”—Josua 23:14.
Yes, yumi save sua se i no longtaem, bambae olgeta promes blong God oli kamtru. Kingdom blong God bambae i finisim ol sik, raf fasin, fasin blong tekem drag, fasin we man i sot long kakae, mo ol faet. Bambae fulwol i kam wan paradaes. (Ol Sam 37:10, 11, 29; Revelesen 21:3, 4) !Yu save bilif fulwan se profet tok ya bambae i kamtru! Hem i kamaot long Man we i Wokem yumi, “we i no save gyaman.”—Taetas 1:2; lukluk Hibrus 6:13-19.
[Foto Credit Line long pej 32]
Cleveland State University Archive