?Bambae Yu Yu Lesin Long Woning?

LONG Mei 19, 1997, wan hariken i smasem distrik blong Jitagong, long Banglades. Spid blong win i kasem 250 kilometa long wan aoa, hemia spid we oli skelem long taon ya, Koks Basar. Long bus eria, ol ruf long natanggura oli lus wantaem nomo, long ples we oli stap bifo, nao i gat sofmad nomo. Sam tri mo pos blong telefon oli kamkamaot fulwan long graon, ol narafala oli brok long tu haf blong olgeta, olsem yu brekem stik majes. Wan stamba tok long niuspepa ya Bhorar Kagoj, i talem se i gat 105 man we oli ded from hariken ya.

Grup blong man we i talemaot weta i tokbaot bigfala win ya 36 aoa bifo we hem i stat. I sua se, samting ya i sevem plante man from we plante handred taosen man oli go long ol simen ples blong stap sef tru long hariken ya.

Stat long ol yia 1880, ol Witnes blong Jeova oli talemaot nius ya se, bambae i no longtaem i gat wan bigbigfala trabol we i spolem bigwan moa long eni hariken we i bin gat. Baebol i talem se hemia “bigfala dei blong Jeova we bambae i mekem ol man oli fraet.” (Joel 2:​31) Sipos yumi lesin long ol profet tok long Baebol we oli givim woning, ating yumi save stap sef long trabol ya.​—Sefanaea 2:​2, 3.

Be samting ya i no minim se ol Witnes blong Jeova oli stap talem ol taem blong panis nomo. No gat, tok blong olgeta i givim hop. Oli wantem tumas givhan long ol man blong oli kasem save long Kingdom blong God, we bambae i sakemaot ol fasin we oli no stret. Baebol, we i Tok blong God, i talem long yumi se: “Bambae i no longtaem, ol man nogud oli lus. Bambae yu save lukaot olgeta, be bambae yu no save faenem olgeta. Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.”—Ol Sam 37:10, 11.

[Foto Credit Line Blong Pija Long Pej 32]

WHO/League of Red Cross