Stret Tingting Long Saed Blong Wok Mo Pleplei

“PLEPLEI i wan naesfala klos, be bambae yu no save werem klos ya oltaem.” Wan man blong raet, we man i no save nem blong hem, i talem ol tok ya. Hem i soemaot klia se pleplei i wan gudfala samting. Be, hem i soem tu se, man i mas skelemgud pleplei wetem wok we i save karem frut.

Tabu spirit i pusum Solomon blong raetem wan haf blong Baebol we i tokbaot samting ya tu. Waes king ya i eksplenem se yumi no mas bitim mak long tufala fasin ya. Fastaem, hem i talem se: “Oli stap talem se fasin ya we man i no wantem wok, i wantem stap nomo olsem, hemia i krangke, bambae man olsem i hanggri gogo i ded.” (Prija 4:5) Yes, man we i les i save kam pua. Mo frut we i kamaot se, man blong les i karem denja i kam long helt mo laef blong hem. Defren olgeta, i gat sam man we oli rere blong lego evri samting from wok blong olgeta. Solomon i tokbaot ol man ya we oli stap gohed blong wokhad olsem, se “hemia i olsem we man i stap resis olbaot nomo.”​—Prija 4:4.

Solomon i gat gudfala risen blong talem se, i gud blong skelem samting: “Nomata we yumi no gat plante samting, be sipos tingting blong yumi i stap gud, yumi no wari, hemia i winim fasin ya we yumi stap hadwok tumas oltaem, be yumi no winim wan samting nating. Fasin ya i olsem we yumi stap resis olbaot nomo.” (Prija 4:6) Man i mas ‘stap glad long ol samting ya we hem i kasem.’ Tok ya i minim se, man i mas tektaem blong haremgud long ol frut we hem i kasem long wok blong hem. (Prija 2:​24) I gat sam narafala samting tu, antap long ol wok we yumi mekem blong laef. Famle blong yumi i nidim se yumi spenem taem wetem olgeta. Solomon i makem klia se, faswan samting we yumi mas mekem, i no blong wok blong yumi nomo, be hemia blong mekem wok blong God. (Prija 12:13) ?Yu yu wan long olgeta ya we i gat stret tingting long saed blong wok?