Ripot Long Wok Blong Kingdom
Tiokratik Wok i Kam Bigwan Moa Long Namibia
GUD nius blong Kingdom blong God i kasem Namibia klosap long yia 1930. Stat long taem ya, plante handred man we hat blong olgeta i gud, oli akseptem mesej blong God we i soem rod blong laef. Ol ekspiryens we oli kam biaen oli soemaot olsem wanem Jeova i stap hivimap ol gudgudfala man i kam insaed long haos blong hem.—Hagae 2:7.
◻ Paulus i wan man we i stap wokem garen blong winim mane. Hem i laef long not-is blong Namibia. Fastaem we ol Witnes blong Jeova oli storeyan wetem Paulus, hemia long taem ya we hem i go visitim bigfala taon blong Windhoek. Kwiktaem Paulus i kasem save se hem i faenem trutok. Hem i gobak long haos blong hem wetem buk ya Yu Save Laef Foreva Long Paradaes Long Wol. Biaen, taem Paulus i wokbaot i go long Rundu, wan taon we i gat wan Haos Kingdom i stap long hem, Paulus i faenem ol Witnes mo i askem strong long olgeta blong oli kam visitim hem.
Be, ples blong Paulus i longwe tumas blong ol Witnes oli save kam mo mekem wan Baebol stadi evri wik wetem hem. Nating se i olsem, Paulus i no letem tingting blong hem i foldaon. Hem i stat stadi Baebol hem wan. Mo tu, hem i strong blong talemaot long narafala man olgeta samting we hem i lanem. Taem i pas, nao hem i stat mekem Baebol stadi wetem wan grup blong man. Taem smol grup ya i harem long radyo se, wan asembli blong ol Witnes blong Jeova bambae i stap long Rundu, oli putum tugeta evri mane we oli kasem long smol pei blong olgeta, nao oli pem rod blong olgeta blong go long asembli ya.
!Hemia fastaem we oli gat wan gudfala jans blong joen wetem ol Witnes blong Jeova! Smoltaem biaen, ol Witnes oli mekem plan blong sanem sam brata, we oli nafgud, blong visitim grup ya oltaem. Tede, i gat sikis pablisa long vilej blong Paulus.
◻ Johanna i stat intres long nem blong God taem hem i harem wan man i tok nogud long saed blong ol Witnes blong Jeova. Johanna i tingtingbak se: “Fastaem we mi harem nem blong Jeova, nem ya i fas i stap long tingting blong mi, nao mi stat tingting se hu ya Jeova. Mi mo hasban blong mi, mitufala i stap klosap long Walvis Bei long Namibia. Wan taem, mitufala i go long taon, ale, mi luk sam Witnes oli stap seremaot Wajtaoa magasin long rod. Oli givim wan magasin long mi nao mi askem olgeta blong stadi Baebol wetem mi, from we mi gat fulap kwestin blong askem. Mi krae taem oli talem long mi se oli no save kam from we trak blong olgeta i brokdaon. Smoltaem biaen, man blong mi i ded, mo mi go stap long taon blong Keetmanshoop. I gat wan spesel paenia (olgeta we oli mekem wok blong prij fultaem) long ples ya, mo hem i givim buk ya Trutok Blong Soemaot Rod Blong Itenel Laef long mi. Stat long taem ya, mi luksave se hemia trutok.
“Taem i pas, ale oli askem mi blong joen long wok blong prij, be fraet we mi gat long ol man i strong tumas long mi. Wan dei mi stap prij long ol haos wanwan, mi prea long Jeova blong hem i letem mi mi ded i bitim we mi prij. Taem mi stat blong prij long rod, mi haed long wan smol kona, mo mi hop se i no gat man i luk long mi. Biaen, mi mekem tingting blong mi i strong naf blong givim wan magasin long wan man we i pas, mo afta long samting ya nomo, mi stat blong toktok. Long dei ya, wetem help blong Jeova, mi serem hop blong Baebol wetem twelef man.
“Tede, hemia 12 yia biaen, nating se mi pua long saed blong bodi, be mi tinghae long jans we mi gat blong joen long wok blong paenia, mo blong kasem glad from wok blong serem trutok long saed blong Kingdom wetem narafala.”