Wan Samting We Hem i Mestem Long New York

SAEN we yu luk long pej ya i stap longtaem long wan klia ples we i isi blong plante man i luk. Stat long 1950 finis i kam, saen ya i stap long wan long ol faktri blong Watchtower Society long eria blong Brooklyn long bigfala taon blong New York. Ol man we oli stap long ol eria longwe mo oli kam wok long taon, ol turis, mo ol narafala man we oli stap wokbaot i pas long ples ya oli stap luk saen ya bakegen mo bakegen we i talem long olgeta blong ridim Baebol evri dei. Ridim leta ya we i kam long wan yangfala gel we i wan Witnes blong Jeova, hem i soemaot paoa blong tok we i stap long saen ya.

“Mi stap storeyan wetem wan fren blong mi we mitufala i stap long sem klas. Mi stap tokbaot wanem we mi wantem mekem taem bambae mi finis long hae skul. Mi stat blong tokbaot Betel we i hedkwota blong ol Witnes blong Jeova mo fren blong mi i intres bigwan blong harem. Hem i talem long mi se long ful laef blong hem, hem i stap long bigfala taon blong New York. Famle blong hem i no intres tumas long skul, be evri moning taem hem i lukluk i go aot long windo, i gat wan saen we i talem se: ‘Ridim Tok Blong God Tabu Baebol Evri Dei.’ Taswe evri dei hem i ridim Baebol bifo we hem i go long skul.

“Afta we hem i muf aot long New York, hem i talem se samting we hem i mestem long saed blong taon ya hemia se taem hem i girap long moning hem i no moa luk saen ya blong ridim Baebol evri dei. !Be from saen ya we hem i luk long bilding blong Watchtower, hem i gohed blong ridim Baebol evridei mo samting ya i kam olsem wan fasin blong hem!”

!I no gat wan narafala rod we i moagud i winim fasin ya blong ridim wan haf blong Tok blong God long stat blong evri dei! Taem yu mekem olsem, bambae i sua se yu yu save gat tangkiu long ol tok blong aposol Pol se: “Tok blong Baebol . . . i save mekem yu yu waes, mo i save lidim yu blong yu save stanap strong long bilif blong yu long Jisas Kraes, blong God i save sevem yu.”—2 Timoti 3:15-17.