Hem i Ded From Wan Rul
“YUMI rimemba August Dickmann (we i bon long 1910), wan long ol Witnes blong Jeova.” Hemia fastok we i stap long wan saen (long pija ya) we oli putumap i no longtaem long wan ples long Sachsenhausen we bifo hem i wan rabis kalabus. ?From wanem wan Witnes blong Jeova i gat nem blong hem i stap long wan saen olsem? Ol narafala toktok we oli raetem long saen ya i talem stori ya se: “Ol SS oli sutum [hem] long fored blong ol man long Septemba 15, 1939, from we hem i gat strong tingting blong no lego bilif blong hem.”
Long 1937, oli putum August Dickmann long rabis kalabus blong Sachsenhausen. Tri dei afta we Seken Bigfala Faet blong Wol i stat, oli givim oda long hem blong saenem wan pepa blong joen long ami. Taem hem i no wantem saenem pepa ya, bos blong ol ami i sanem toktok i go long Heinrich Himmler, we i hed blong ol SS (Schutzstaffel, impoten gad blong Hitler), mo i askem long Himmler blong hem i save kilim Dickmann i ded long fored blong ol narafala man we oli stap long kalabus. Long Septemba 17, 1939, niuspepa ya New York Times long Jemani, i talemaot se: “August Dickmann, we i gat 29 yia, . . . wan grup blong ami oli sutum hem i ded.” Niuspepa ya i talem se hem i faswan man Jemani we i gat strong tingting blong agensem bigfala faet ya from bilif blong hem.
Sikisti yia biaen, long Septemba 18, 1999, olgeta blong Brandenburg Memorial Foundation oli makem dei ya blong tingbaot wanem we i bin hapen. Mo naoia, taem ol man oli kam blong visitim ples ya oli save luk saen ya we i mekem olgeta oli tingbaot fasin no fraet mo strongfala bilif we Dickmann i gat. Wan narafala saen we i stap afsaed long stonwol blong kalabus ya i mekem ol man oli tingbaot se Dickmann hem i jes wan long samwe 900 Witnes blong Jeova we oli bin safa long Sachsenhausen from we oli holemstrong long bilif blong olgeta. Plante moa Witnes oli safa long ol narafala kalabus. Yes, nating se oli kasem hadtaem we i nogud olgeta long ol rabis kalabus ya, plante oli stap tru long ol rul blong God.
Long tingting blong ol Witnes blong Jeova, i wan wok blong ol Kristin blong “ona long gavman.” (Rom 13:1) Nating se ol gavman oli traem blong fosem olgeta blong brekem ol loa blong God, oli folem eksampel blong ol faswan Kristin, we oli talem se: “Mifala i mas obei long God, mifala i no save obei long man.” (Ol Wok 5:29) From samting ya, long wol ya we ol laen blong man oli stap olsem enemi mo ol man blong ol kantri oli no laeklaekem olgeta, ol Witnes blong Jeova long evri ples, oli lukaot pis, olsem August Dickmann. Oli folem advaes ya long Baebol, we i leftemap tingting se: “Bambae yufala i no letem ol rabis fasin i winim yufala. Yufala i mas holemstrong ol stret fasin blong yufala, blong winim ol rabis fasin.”—Rom 12:21.