Ol Gudfala Wok Oli Leftemap Nem Blong God

OLGETA we oli lavem God, oli traehad blong saenaot olsem laet long saed blong spirit we i kamaot long Tok blong hem, Baebol. Long rod ya, oli folem oda blong Jisas se: “Laef blong yufala i olsem laet, mo yufala i mas letem laet ya i saenaot i kasem ol man, blong oli save luk ol gudgudfala wok we yufala i stap mekem. Nao bambae olgeta oli save leftemap nem blong Papa blong yufala we i stap long heven.” (Matiu 5:16) Ol toktok mo ol fasin we oli stret, tufala samting ya oli save leftemap nem blong God.

Ol Witnes blong Jeova oli traehad blong mekem God i glad taem oli mekem laef blong olgeta i laenap wetem Baebol mo oli traehad blong givim help long saed blong spirit long ol narafala. Oli mekem samting ya long plante kantri we gavman i no rejistarem wok blong olgeta yet. Long bigfala taon blong wan kantri olsem, ol Witnes oli stap mekem ol bigfala asembli evri yia, mo i gat samwe long 6,000 kasem 9,000 man oli kam. Blong mekem ol asembli ya, ol Witnes oli rentem wan bigfala haos we ol man oli stap yusum blong mekem eksebisen long hem. Olsem oli bin mekem long ol yia i pas finis, bifo long asembli blong 1999, plante handred Witnes oli wokhad blong klinim haos ya, oli putumap ol maekrofon mo narafala samting blong mekem saon, mo oli karem plante taosen jea i kam.

Ol wok ya oli no gohed long fasin haed. Ol man we oli wok insaed long bigfala haos ya oli stap wajem wok we ol brata oli mekem. Oli luk se, nating we 15,666 man oli kam tugeta long asembli ya, evri samting i ron gud mo ol Witnes oli wok folem oda. Ol man ya oli sapraes tu blong luk we ol brata oli joen tugeta blong klinim gud olgeta ples afta long asembli ya.

Ol man we oli bos long haos ya oli soem tangkiu long ol Witnes from samting ya, nao oli putum ol Witnes ya long lis blong ol impoten man we oli faswan blong gat raet blong rentem haos ya long yia we i kam biaen. Be ol man ya oli mekem wan samting moa. Long Julae 15, 1999, oli givim wan awod long komiti we i lukaot long asembli ya, blong talem tangkiu long olgeta. Long awod ya oli raetem tok ya “kongregesen blong ol Witnes blong Jeova”—hemia wan samting blong sapraes taem yumi tingbaot se wok blong tijim Baebol i no rejista yet folem loa long kantri ya.

Long olgeta ples long wol, long yia 2000 go kasem 2001, plante milian man bambae oli kam tugeta long “Yumi Mekem Wanem We Tok Blong God i Talem,” Distrik Asembli blong ol Witnes blong Jeova. Sipos yu joen long wan long ol asembli ya bambae yu save luk olsem wanem olgeta ya we oli traehad blong folem tok blong Baebol, oli mekem ol gudfala wok we i leftemap nem blong God.