Pis Long Wol—?Olsem Wanem Blong Kasem?

?BAMBAE i no longtaem ful wol i gat pis? Plante man we bifo oli tingting olsem, naoia oli no ting se bambae i gat pis. Wan ripot long niuspepa ya Daily Mail & Guardian, long Saot Afrika, i stap tokbaot ol traem we bambae yumi fesem long fiuja i se, “tingting ya long saed blong fiuja, we plante man oli bin tokbaot 10 yia bifo, se wan niufala laef wetem ol loa blong hem bambae i kavremap ful wol, i foldaon olgeta.”

Ol man we oli raetem ol tok ya long niuspepa, oli tokbaot hop we plante man oli bin gat 10 yia bifo. Kol Woa i jes finis, mo ol faet bitwin ol wol paoa oli no moa gohed. Plante man oli ting se wan niufala impoten taem i stat, oli ting se bambae ol man oli stat blong mekem ol bigfala wok blong finisim fasin pua, ol sik, mo ol problem long saed blong envaeronmen. Niuspepa ya i talem se: “Ol tingting ya long saed blong fiuja, naoia oli kam olsem wan drim we bambae i neva kamtru. Ol niufala faet oli girap long ol ples we yumi no save gud olgeta nating; fasin pua long wol i gohed blong kam antap. I gat tu moa kantri bakegen we naoia oli gat ol niuklia bom. Yunaeted Nesen i lusum gudnem we hem i gat from we hem i no naf blong finisim kwiktaem ol bigfala trabol we man i stap kasem long wan kantri afta narawan. Drim we plante man oli gat long saed blong wan gudfala laef, naoia i jenis i kam olsem wan nogud drim blong wan ples blong trabol we ol man oli laef wetem fasin fraet.”

Ol studen blong Baebol oli luksave se ol traehad blong man, nating se i bigwan olsem wanem, be oli no save winim ol problem fulwan. ?From wanem? From we, olsem Baebol i talem, “olgeta man blong wol ya oli stap long paoa blong Setan.” (1 Jon 5:19) God i wokem wol ya blong i kam wan gudfala paradaes, be samting ya i no save kamtru yet, from we ful wol i stap long paoa blong Setan.

Long semtaem, i gat risen blong gat gudfala tingting long saed blong fiuja. Jeova God i promes blong putum pis long ful wol. Hemia i no minim se bambae hem i fiksimap olfala wol ya nomo, be bambae hem i putum wan “niufala wol” we “stret fasin nomo bambae i stap long hem.” (2 Pita 3:13) Yes, bambae God i yusum Kingdom blong hem blong mekem wol blong yumi i kam wan ples blong pis mo glad, wan ples we olgeta man we oli gat fasin obei bambae oli stap glad oltaem long laef mo wok blong olgeta. Antap moa God i promes blong “ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.” Olgeta promes ya oli no stanap long ol tingting blong man we oli no sua long saed blong fiuja. Defren olgeta, ol promes ya oli stanap long ol tok we yumi save trastem, hemia Tok blong Man ya we i Wokem olgeta samting, we hem i no save giaman.—Revelesen 21:4; Taetas 1:2.

[Futnot]