Trufala Fasin Naes i Stap Oltaem

WAN OLFALA KRISTIN ELDA WE I HOLEM STRONG LONG BILIF I TALEM SE: “WAN YANGFALA MAN I SOEMAOT SE HEM I NAES TAEM HEM I WOKEM OL GUDFALA FASIN.”

Yes, longtaem finis i kam, ol man oli leftemap naesfala bodi bitim mak, samting ya i mekem se oli no luksave ol gudfala fasin blong wan man. Be, Man We i Wokem yumi, i stap luk wanem we i stap dip insaed long yumi, nating se bodi blong yumi i olsem wanem. Long rod ya, hem i soem wan nambawan eksampol long saed blong fasin blong skelem man. Folem wanem we i stap insaed long Baebol, God hem wan i talem se: “Fasin blong mi blong lukluk man i no olsem fasin blong man. Man i stap lukluk long bodi blong man nomo, be mi mi stap lukluk long tingting blong hem.”​—1 Samuel 16:7.

God nao i Stamba blong trufala fasin naes long man, mo Tok blong hem i soemaot se ol samting long saed blong spirit nao oli moa impoten taem yumi stap skelem wan man. Baebol i talem se: “Gudfala fasin blong woman i save trikim man isi nomo, mo fes we i naes i no save stap longtaem. Be woman we i stap ona long Hae God, i stret blong olgeta man evriwan oli stap leftemap nem blong hem.” (Ol Proveb 31:30) I tru maet naesfala bodi blong wan man i save haedem ol trufala fasin blong hem we oli no naes nating. (Esta 1:​10-​12; Ol Proveb 11:22) Maet naesfala bodi i lus taem ol yia oli stap pas, be ol naesfala fasin​—ol nambawan fasin long hat​—oli save gru mo oli stap longtaem.

!From samting ya i waes tumas blong wokem ol fasin olsem lav, glad, pis, longfala tingting, kaen fasin, gudfala fasin, bilif, kwaet fasin, mo bos long tingting! (Galesia 5:​22, 23) Long rod ya, yumi save kasem trufala fasin naes we i sas tumas.​—1 Pita 3:​3, 4.