‘Talem Tangkiu Long Ol Witnes Blong Jeova From Fasin Fri Blong Wosip’
“WAN haf long niuspepa ya, USA Today, i talem se: “Bifo yu sarem doa blong yu long wan Witnes blong Jeova, tekem smoltaem blong tingbaot ol trabol we ol man oli bin mekem long olgeta i no longtaem i pas. Mo tu, tingbaot olsem wanem ol Witnes oli bin givhan blong mekem Faswan Jenis long Konstitusen blong Yunaeted Stet, ywe i givim raet long olgeta man blong mekem wosip long fasin we i fri.” Long Yunaeted Stet, long ol yia 1940, ol man oli bin mekem nogud long ol Witnes blong Jeova, from we oli no wantem salut long flag, mo from sam narafala samting bakegen.—Eksodas 20:4, 5.
Long faef yia, i stat long 1938 go kasem 1943, i gat samwe long 30 kot kes we Saprim Kot blong Yunaeted Stet i stretem long saed blong ol Witnes blong Jeova. Niuspepa ya i talem se: “From we ol Witnes nao oli stanemap plante impoten kwestin long saed blong Faswan Jenis long Konstitusen, Jaj Harlan Fiske Stone i raetem se, ‘Ol man oli mas presem ol Witnes blong Jeova from we oli givhan blong winim ol problem blong loa long saed blong fasin fri blong ol man.’ ”
Taswe, klosap long en blong haf ya, niuspepa i talem se: “Evri skul i mas talem tangkiu long ol Witnes blong Jeova from we oli givhan blong mekem se gavman i letem ol skul oli fri moa blong wosip.”
[Foto Credit Line blong pija long pej 32]
Background, building: Photo by Josh Mathes, Collection of the Supreme Court of the United States; lower left, justices: Collection of the Supreme Court of the Unites States