Samting We Oli No Save Fogetem

EVRI yia, ol Witnes blong Jeova long ol wanwan kantri oli joen tugeta long ol Kristin asembli. Oli mekem olsem blong haremgud long fasin joen we oli gat mo ol nambawan samting long saed blong spirit we i save mekem oli strong long bilif. Be i gat sam narafala samting bakegen we ol man long ol asembli ya oli no save fogetem.

Eksampol, long Julae 1999, plante taosen Witnes long Mosambik oli hivap wanples blong holem Distrik Asembli ya blong tri dei, nem blong hem “Profet Tok We i Kamaot Long God.” Plante long olgeta we oli stap long taem ya, hem i fastaem blong olgeta blong joen long wan asembli olsem. Oli sapraes tumas long ol tok we i kamaot, be tu oli sapraes long ol samting we oli luk raonabaot long olgeta.

Wan woman i we i bin stap long Maputo Haos Asembli i talem se: “!Long laef blong mi, mi neva luk wan naesfala ples olsem! Long ol batrum, i gat sop mo glas blong lukluk, mo ol batrum ya oli rili klin gud. Ol man raonabaot long mi oli gat pis, mo yu no save harem noes blong ol pikinini we oli stap faet, no pleplei olbaot. I no gat man we i pusum narafala man. !Mo mi luk ol gudfala yangfala we oli glad blong tekpat long asembli ya we rili leftemap tingting. Mi sapraes tu blong luk se evriwan i putum ol klos we i stret nomo. Mi mas talemaot ol gudfala samting ya long man blong mi blong bambae nekis taem, mi tekem hem wetem ol pikinini blong mi oli kam joen long wan asembli olsem.”

Yes, ol man oli stap lukluk trufala fasin, stret fasin, mo fasin klin blong ol Witnes blong Jeova. ?Be from wanem ol Witnes oli defren long ol narafala man? From we oli rili wantem folem wanem we oli lanem long Baebol. Yes, long yia ya, bambae oli gat wan asembli olsem, mo evri wik oli gat miting long ol Haos Kingdom blong olgeta. I gud sipos yu go joen wetem olgeta long ol taem ya.

[Tok blong pija long pej 32]

SAMBIA

[Tok blong pija long pej 32]

KENIA

[Tok blong pija long pej 32]

MOSAMBIK