Soem Fasin Tangkiu Mo Haremgud

WAN niuspepa long Kanada, we nem blong hem Calgary Herald, i talem se: “Fasin tangkiu i wan long ol stamba fasin we i mas stap long hat blong olgeta man.” Niuspepa ya Herald i tokbaot sam skul studen we oli gat naen yia nomo, mo we tija blong olgeta i askem olgeta blong raetemdaon olgeta samting we oli gat tangkiu from. Wan yangfala i talem se hem gat tangkiu from famle blong hem ‘we i keagud long hem.’ Wan narafala yangfala gel tu i gat tangkiu from famle blong hem, hem i se: “Famle blong mi i mekem mi mi sef, hem i kea long helt blong mi, hem i lukaotgud mi, i lavem mi, i givim kakae long mi, mo from papa mama i bonem mi, mi mi laef long wol.”

Ol man we oli no gat fasin tangkiu, oli neva save glad long wan samting. Wan man we i stadi long ol tijing blong jos, J. I. Packer, i talem se: “God i wokem yumi long wan fasin we yumi nidim Hem mo yumi nidim yumi blong givgivhan long yumi.” Samting ya i mekem yumi tingbaot waes advaes we Baebol i givim plante handred yia bifo se: “Oltaem yufala i mas talem tangkiu.” (Kolosi 3:15) Fasin ya blong talem tangkiu, we i kamaot long hat, i halpem yumi blong frengud mo kea long ol narafala.

Mo antap long samting ya, taem yumi gat tangkiu mo yumi tinghae long ol narafala, yumi soem se yumi gat tangkiu long Jeova, mo Jeova i lukluk samting ya. Baebol i talem se: “Oltaem, Hae God i stap luklukgud long olgeta samting long wol ya, blong i save givim paoa long ol man we oli ona long hem long olgeta tingting blong olgeta.” (2 Kronikel 16:9) God i mekem yumi sua se hem i tingbaot mo i lukaotgud long olgeta we oli lavem nem blong hem. (Hibrus 6:10) Yes, yumi gat gudfala risen blong soem tangkiu, from we fasin ya i wan fasin blong Jeova. Taem yumi soem fasin ya evri dei, yumi mekem Jeova i glad mo yumi tu yumi haremgud. I olsem Ol Proveb 15:13 we i talem se: “Sipos man i harem gud, ol man oli luksave long fes blong hem.”