“From Laet Blong Yu Nao, Mifala i Stap Luk Delaet”

LAET i wan samting we plante taem yumi ting nating long hem, gogo kasem we lektrik i ded mo evri ples raon long yumi i stap long tudak. Yumi glad se “paoa stesen” we i stap long skae—hemia san—i gohed blong wok oltaem nomo. Mo from laet we i kam long san, yumi save lukluk, kakae, pulum win, mo yumi gat laef.

From we laet i impoten tumas long laef, yumi no sapraes blong ridim long Jenesis we laet i kamaot long faswan dei nomo we God i wokem ol samting. “God i tok. Fastaem, hem i talem se, ‘I mas gat delaet.’ Nao delaet i kamtru olsem we hem i talem.” (Jenesis 1:3) Oltaem ol man we oli wosip long Jeova, olsem King Deved, oli lukluk Jeova olsem stamba blong laef mo laet. Deved i bin raetem se: “Yu yu stamba blong laef blong olgeta samting, mo from laet blong yu nao, mifala i stap luk delaet.”—Ol Sam 36:9.

Deved i stap tokbaot prapa laet, mo tu, i tokbaot laet olsem wan pijatok. Buk ya Encyclopædia Britannica, i talem se: “Laet nao i mekem se yumi save luk ol samting.” Hem i talem bakegen se: “Ol save we bren i kasem i kamaot moa from samting we ae i luk, i bitim we i kamaot from fasin blong harem, smelem, testem, no filim samting.” Baebol i yusum laet olsem pijatok tu from we bighaf blong ol samting we yumi lanem oli dipen long ae blong yumi, we i nidim laet blong i save lukluk gud.

Taswe, Jisas i talem long ol disaepol blong hem se: “Mi nao, mi olsem laet blong ol man long wol. Man we i biaen long mi, bambae hem i no save wokbaot long tudak. Hem bambae i gat laet blong laef.” (Jon 8:12) Laet ya we Jisas i tokbaot, hem i pija blong trutok we hem i stap talemaot, we i givim save olsem laet long tingting mo hat blong ol man we oli lesin long hem. Afta plante yia we ol disaepol blong Jisas oli stap long tudak long saed blong spirit, oli save kasem save long stamba tingting blong God long saed blong ol man mo promes long saed blong Kingdom. Save ya hem i trufala “laet blong laef,” from we hem i save lidim man i go long laef we i no save finis. Jisas i prea long Papa blong hem long heven i se: “Laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) !Yumi neva mas ting nating long laet ya long saed blong spirit!