?Olsem Wanem Blong Yusumgud Evri Dei Blong Laef Blong Yumi?

“SOEM long mifala olsem wanem blong kaontem ol dei blong mifala, blong mifala i save kam waes long hat blong mifala.” (Ol Sam 90:​12, NW ) Moses we i raetem sam long ol buk long Baebol, i mekem prea ya wetem tingting daon. ?Wanem samting ya we hem i stap askem long prea blong hem? ?Olsem wanem long yumi? ?Yumi mas askem samting ya tu long prea blong yumi?

Long vas 10, Moses i harem nogud blong luk se laef blong man i sotfala nomo. Long wan narafala taem, hem i talem bakegen tok blong Job se: “Mifala man we i bon long wol ya, mifala i no strong. Laef blong mifala i sotfala nomo, mo i fulap long trabol.” (Job 14:1) Moses i harem nogud tumas from we hem i save se ol sin man oli no save laef longtaem. Taswe, hem i luk evri dei blong laef blong hem olsem wan samting we i sas tumas. Taem Moses i mekem prea ya long God, hem i soem se hem i wantem blong yusum gud ol dei blong laef blong hem we i stap yet, long fasin we i waes mo we i save mekem God i glad long hem. Yumi tu yumi mas traehad blong yusum gud evri dei blong laef blong yumi long fasin we i waes, sipos yumi wantem we God i glad long yumi.

I gat wan narafala samting tu we i pulum Moses mo Job blong gat tingting ya, mo samting ya i save givhan long yumi tu. Tufala man ya blong God, tufala i lukluk i go long praes ya long fiuja​—laef long wol ya taem i no moa gat trabol long hem. (Job 14:​14, 15; Hibrus 11:26) Long taem ya, bambae i no gat samting i save spolem ol gudfala wok we man i mekem from we bambae i no moa gat ded. Stamba tingting blong Man ya we i Wokem olgeta samting, hemia se olgeta man we oli obei long hem bambae oli laef foreva long wan paradaes wol. (Aesea 65:​21-24; Revelesen 21:​3, 4) Yu tu yu save stap long taem ya sipos yu ‘kaontem ol dei blong yu, blong yu save kam waes long hat blong yu.’