“Stat Tede, Mi Mi Bilif Se i Gat Wan God i Stap”
ALEXANDRA i wan woman Yukren we i laef long Prague hemia long Jek Ripablik. Wan dei, taem hem i finis long wok mo i stap gohom, hem i faenem wan paos long ples we bas i stap stop long hem. Ol man we oli pas long rod ya oli stap kikim paos ya olbaot. Taem hem i pikimap paos ya mo i lukluk insaed, hem i sek bigwan. I gat plante pepa mane i stap insaed, hemia pepa mane ya 5,000 koruna (mane blong Jek Ripablik). I luk olsem se i no gat wan man raonabaot long Alexandra we i stap lukaot paos ya. Alexandra i no wan woman Jek mekem se i had blong hem i winim naf mane blong laef. ?Bambae hem i mekem wanem wetem mane ya?
Taem Alexandra i go long haos blong hem, hem i soem paos ya long gel blong hem, Victoria. Tufala i openem paos ya blong traem faenem nem mo adres blong man we paos ya i blong hem, be tufala i no faenem. Be, insaed long paos ya i gat wan pepa we oli raetem sam namba long hem. Long wan saed blong pepa ya, oli raetem wan akaon namba, mo long narasaed, i gat sam narafala namba we oli raetem i stap. Insaed long paos ya, i gat nem blong wan bang mo wan smol not we i talem se “330,000 koruny (bitim wan milian vatu).” Hemia nao stret mane we i stap insaed long paos ya.
Alexandra i traem blong ring long bang ya long namba we i stap long pepa, from we hem i ting se hem i wan telefon namba. Be hem i no kasem bang. Ale, hem mo gel blong hem tufala i go long bang ya blong eksplenem wanem i bin hapen. Oli askem long saed blong akaon namba we oli faenem insaed long paos ya. Be, bang i no faenem wan akaon namba olsemia. Long nekis dei, Alexandra i gobak wetem narafala namba we i stap long pepa ya. Ale, bang i jekem mo i luk we hemia akaon namba blong wan woman. Alexandra mo Victoria tufala i telefon long woman ya, mo woman ya i talem se hem nao i bin lusum paos ya. Taem oli go mitim woman ya, hem i talem bigfala tangkiu long tufala mo i askem se: “?Yutufala i wantem we mi givim wanem long yutufala from we yutufala i givimbak mane blong mi?”
Victoria i ansa long hem se: “Mitufala i no wantem kasem wan samting. Sipos mitufala i wantem mane ya, bambae mitufala i holem nomo blong mitufala.” Victoria i save smol lanwis Jek nomo, nao hem i eksplenem long woman ya long lanwis se: “Mitufala i givimbak mane ya long yu from we mitufala i Witnes blong Jeova. Tingting blong mifala we mifala i trenem folem Baebol i no save letem mifala i karem samting we i no blong mifala.” (Hibrus 13:18) Woman ya i glad tumas mo i talem se: “Stat tede, mi mi bilif se i gat wan God i stap.”