Kwestin Blong Olgeta We Oli Ridim Magasin Ya . . .
?From Wanem God i Wantem Givim Presen Ya Blong Laef We i No Save Finis Long Ol Man?
▪ Baebol i talem se God i givim janis long yumi blong kasem “laef we i no save finis.” (Jon 6:40) ?From wanem hem i givim janis ya long yumi? ?Hemia from stret fasin blong hem nomo?
Man we i gat stret fasin i mekem wanem we i gud mo i stret long narafala. ?Olsem wanem? ?I stret we yumi kasem laef? Nogat. Baebol i talem se: “I no gat man long wol ya se i no save mekem mastik, we oltaem i stap mekem i stret nomo.” (Prija 7:20) Sin i gat panis blong hem. God i givim woning long faswan man ya Adam, se long dei we hem i mekem sin bambae hem i ded. (Jenesis 2:17) Biaen, tabu spirit i pulum aposol Pol blong raetem se: “Ol man we oli stap mekem sin, pei blong olgeta, bambae oli ded from.” (Rom 6:23) Sipos i stret we ol pikinini blong Adam oli ded from sin we oli mekem, ?from wanem God i wantem givim laef we i no save finis long olgeta?
Laef we i no save finis, God i givim ‘long gladhat blong hem’ nomo. Hem i wantem givim from we lav mo gladhat blong hem i bigwan tumas mo i go kasem evri man. Baebol i talem se: “Olgeta evriwan oli mekem nogud finis, mo oli stap afsaed olgeta long ol gudgudfala fasin blong God. Be long gladhat blong God, hem i stap givhan long olgeta. Hem i stap mekem olgeta oli stret man long fes blong hem, from we oli joen long Jisas Kraes we i pem rod finis, blong olgeta oli go fri.”—Rom 3:23, 24.
I stret we yumi evriwan i ded nomo, be God i wantem givim laef we i no save finis long olgeta we oli lavem hem. ?Olsem wanem? ?God i mekem i no stret? Baebol i talem se: “?Bambae yumi talem olsem wanem? ?Yumi save talem se God i mekem i no stret? !Nogat! Hem i mekem i stret nomo, from we hem i talem finis long Moses se, ‘Sipos mi mi wantem sore long wan man, bambae mi save mekem olsem, mo sipos mi wantem kaen long wan man, bambae mi save mekem olsem.’ . . . Yu yu man nomo, yu no gat raet blong tokbak long God.”—Rom 9:14-20.
Long sam ples long wol, wan haeman blong gavman no wan jaj i save tekemaot strong panis we wan man blong brekem loa i kasem, mo oli save letem hem i gofri long kalabus. Sipos man nogud ya i folem ol oda mo tabu we oli putum long hem mo i jenisim tingting mo fasin blong hem, wan jaj no presiden blong kantri i save daonem panis blong hem no tekemaot panis ya fulwan. I stret we man ya i kasem strong panis from nogud fasin blong hem, be oli wantem mekem i gud long hem nomo.
Long sem fasin, Jeova i save mekem desisen blong tekemaot panis we i stret long ol sinman. From bigfala lav blong hem, hem i save givim laef we i no save finis long olgeta we oli lavem hem mo obei long ol tok blong hem. Baebol i talem se: “God i stap mekem i sem mak nomo long olgeta man. . . . Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.”—Ol Wok 10:34, 35.
Samting we Jeova i mekem long yumi we i soemaot lav blong hem moa i bitim ol narafala samting, hemia se hem i sanem Pikinini blong hem blong i harem nogud long bodi blong hem mo i ded from yumi. Jisas i tokbaot Papa blong hem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”—Jon 3:16.
Olgeta we oli lavem Jeova mo oli mekem samting we hem i wantem, God i glad long olgeta evriwan ya, nomata wanem fasin blong laef blong olgeta bifo. Taswe, janis blong kasem laef we i no save finis i wan samting we God i givim from bigfala lav mo gladhat blong hem nomo, nating we yumi no rili stret blong kasem presen olsem.
[Tok blong pija long pej 25]
Laef we i no save finis i wan samting we God i givim from bigfala lav mo gladhat blong hem nomo