Yumi Lanem Samting Long Tok Blong God

?From Wanem God i Stap Lidim Wan Grup Blong Man?

Ol tok we oli kam biaen oli tokbaot sam kwestin we maet yu yu stap askem, mo oli talem weples yu save ridim ansa blong ol kwestin ya long Baebol blong yu. Ol Witnes blong Jehova bambae oli glad blong tokbaot ansa blong ol kwestin ya wetem yu.

1. ?From wanem God i lidim ol man Isrel?

God i mekem se olgeta we oli kamaot biaen long Ebraham oli kam wan neson, mo hem i givim ol loa long olgeta. Hem i singaot neson ya se Isrel. Neson ya i mas lukaot gud blong mekem wosip long tru God long fasin we i stret. Mo neson ya i mas meksua se Tok blong God Baebol, i stap gud. (Ol Sam 147:19, 20) Olsem nao, ol man blong olgeta kantri oli kasem blesing from neson ya.—Ridim Jenesis 22:18.

God i jusumaot ol man Isrel blong oli kam ol witnes blong hem. Taem oli obei long ol loa blong God, ol loa ya oli mekem i gud long olgeta. (Dutronome 4:6) Sipos yumi stadi long histri blong ol man Isrel, bambae yumi save moa God ya we i tru.—Ridim Aesea 43:10, 12.

2. ?From wanem God i lidim ol tru Kristin blong oli wok olsem wan grup?

Ol man Isrel oli no obei long God, ale God i no moa glad long olgeta. Hem i stanemap Kristin kongregesen we i tekem ples blong neson blong Isrel. (Matiu 21:43; 23:37, 38) Bifo, ol man Isrel oli witnes blong Jehova. Be naoia, ol tru Kristin oli witnes blong Jehova.—Ridim Ol Wok 15:14, 17.

Jisas i tijim ol man blong hem blong oli wok olsem wan grup blong oli talemaot trutok long saed blong Jehova, mo blong oli pulum ol man blong olgeta kantri oli kam man blong hem. (Matiu 10:7, 11; 24:14; 28:19, 20) Naoia, wok ya i stap go from en blong hem. Hemia fastaem we Jehova i pulum plante milian man blong olgeta kantri oli joen long tru wosip. (Revelesen 7:9, 10) Ol tru Kristin tu oli wok olsem wan grup blong oli lefleftemap tingting blong olgeta, mo blong oli givgivhan long olgeta. Nomata wanem kantri oli stap long hem, tijing blong Baebol we oli kasem long ol miting blong olgeta i sem mak.—Ridim Hibrus 10:24, 25.

3. ?Ol Witnes blong Jehova tede, oli stat blong wok long wan grup olsem wanem?

Ol Witnes blong Jehova tede, oli stat blong wok long wan grup long ol yia 1870. Wan smol grup blong ol Baebol studen i faenemaot ol trutok long Baebol we longtaem ol man oli no save. Ol Baebol studen ya oli save se Jisas i stanemap Kristin kongregesen blong i mekem wok blong prij. Taswe, oli talemaot gud nius blong Kingdom long olgeta ples long wol. Long yia 1931, oli karem nem ya ol Witnes blong Jehova.—Ridim Ol Wok 1:8; 2:1, 4; 5:42.

4. ?Tede, Jehova i lidim ol Witnes blong hem olsem wanem?

Long taem blong ol fas Kristin, hed kampani i mekem i gud long ol Kristin kongregesen we oli stap long ol defdefren ples. Long hed kampani ya, i gat ol aposol mo sam elda. Oli tingbaot se Jisas nao i Hed blong kongregesen. (Ol Wok 16:4, 5) Tede tu ol Witnes blong Jehova oli tingbaot se Jisas i Lida blong olgeta. (Matiu 23:9, 10) Oli harem gud from we Hed Kampani i givim ol save blong Baebol, we i leftemap tingting blong ol Kristin long bitim 100,000 kongregesen mo i lidim olgeta. Sam elda we oli save gud ol tok blong Baebol, oli mekemap Hed Kampani. Long evri kongregesen, ol man we oli gat fasin olsem we Baebol i talem, oli mekem wok blong elda, mo oli lukaot long kongregesen. Fasin blong ol man ya i soemaot se oli lavem ol sipsip blong God mo oli tingbaot olgeta.—Ridim 1 Pita 5:2, 3.

Ol Witnes blong Jehova oli wok olsem wan grup blong talemaot gud nius, mo oli pulum ol man oli kam disaepol blong Kraes. Oli wantem givhan long ol man long olgeta ples. Taswe oli tanem ol buk we i tokbaot Baebol, long bitim 500 lanwis. Biaen oli printim ol buk ya mo oli seremaot long ol man. Olsem ol aposol bifo, ol Witnes blong Jehova oli go prij long ol man long ol haos blong olgeta. (Ol Wok 20:20) Oli glad blong stadi Baebol wetem ol man we oli laekem trutok. Bigfala samting we ol man blong Jehova oli wantem, hemia blong mekem God i glad mo blong givhan long ol narafala. Taswe, oli wan grup blong ol man we oli glad.—Ridim Ol Sam 33:12; Ol Wok 20:35.

Sipos yu wantem save moa, plis lukluk japta 19 long buk ya ?Wanem Samting We Baebol i Rili Tijim? we ol Witnes blong Jehova oli wokem.