?I Tru Se Ol Merikel Oli Save Hapen?—Tri Tingting We Plante Man Oli Gat

FASWAN TINGTING: Ol merikel oli no save hapen from we oli agensem ol loa we i bos long ol samting raonabaot long yumi. Ol save we ol saentis oli faenemaot, oli givhan long yumi blong kasem save long ol loa we i bos long ol samting raonabaot long yumi. Be maet i gat sam samting we oli no save laenap wetem ol loa ya. Save blong yumi i smol tumas. (Job 38:4) Maet wan saentis i spenem ful laef blong hem blong stadi long wan long ol loa ya. Be wan samting nomo we i no laenap wetem save ya, bambae i mekem se hem i mas stadi bakegen long loa ya. I sem mak, wan man i rong taem hem i talem se olgeta dakdak i waet, be biaen i faenemaot se i gat wan blak dakdak.

I gat wan fani stori we i soemaot se taem man i no gat evri save long saed blong wan samting, i isi nomo blong hem i mekemap prapa tingting blong hem long samting ya. John Locke (we i bon long yia 1632 mo i ded long yia 1704) i tokbaot ambasada blong Holan mo king blong Taelan: Ambasada i stap tokbaot kantri blong hem long king. Hem i talem se samtaem elefen i save wokbaot antap long wota. Be king i no wantem bilif long stori ya. Hem i ting se ambasada i stap giaman long hem. Be ambasada i stap tokbaot samting we king i no save. King i no save se taem wota i kam aes, elefen i save wokbaot antap long hem, nating se hem i hevi olsem wanem.

Yu traem tingbaot sam samting we ol man oli mekem tede, we plante yia bifo, oli ting se oli no save mekem:

● Wan plen i save karem bitim 800 man, stat long New York i go kasem Singapo, we i no stop nating. Hem i flae long wan spid blong 900 kilometa long wan aoa.

● Taem i gat wan bigfala miting long wan kantri, ol man oli no nid blong go long kantri ya, be oli save folem miting ya long video nomo, mo oli save toktok wetem ol narafala long miting ya.

● Ol man oli save rikodem plante taosen miusik long wan masin we i smol moa long bokis blong mases.

● Taem hat mo sam narafala haf blong bodi blong man i nogud, dokta i save jenisim.

?Ol samting ya oli soemaot wanem? Sipos ol man oli save mekem sam bigbigfala samting we plante yia bifo oli ting se oli no save mekem, yumi save trastem God ya we i mekem heven mo wol. Hem i save mekem ol bigbigfala wok we yumi no naf blong kasem save long olgeta, mo yumi no save mekem tu.a—Jenesis 18:14; Matiu 19:26.

NAMBATU TINGTING: Baebol i yusum merikel blong mekem ol man oli bilif. Baebol i no talem se yumi mas bilif long evri merikel. Be hem i givim woning long yumi blong yumi no trastem ol merikel mo ol bigfala saen we man i mekem. Baebol i givim klia woning ya se: “Man blong Brekem Loa ya, hem bambae i kamtru long paoa blong Setan, mo hem bambae i wokem ol naranarafala merikel mo giaman saen mo samting blong sapraes. Hem bambae i yusum evrikaen trik we oli no stret, blong i giaman long ol man.”—2 Tesalonaeka 2:9, 10, Nyutesteman wetem Ol Sam long Bislama (NTB).

Jisas i givim woning tu se plante man bambae oli talem se oli biaen long hem, be oli no ol man blong hem. Samfala bambae oli talem long Jisas se: “Masta, Masta. Long nem blong yu, mifala i talemaot ol tok we God i givim long mifala. Mo long nem blong yu, mifala i ronemaot plante devel. Mo long nem blong yu, mifala i mekem plante merikel. ?Olsem wanem long mifala?’ (Matiu 7:22, 23) Be Jisas i talem se bambae hem i no agri long olgeta from oli no man blong hem. (Matiu 7:23) I klia se Jisas i no tijim se olgeta merikel oli kamaot long God.

God i no talem se bilif blong ol man blong hem i mas stanap long ol merikel nomo. Be hem i talem se bilif blong olgeta i mas stanap long ol samting we oli tru.—Hibrus 11:1.

Bambae yumi luk wan merikel long Baebol we plante man oli save long hem. Hemia taem Jisas i laef bakegen. Plante yia afta long taem ya, sam Kristin long Korin oli stat blong askem sipos i tru se Jisas i laef bakegen. ?Aposol Pol i givhan long ol Kristin ya olsem wanem? ?Yu ting se hem i talem nomo se, “Yufala i mas gat moa bilif”? Nogat. Yu traem luk samting we Pol i talem blong pruvum se Jisas i laef bakegen. Hem i talem se “oli berem [Jisas]. Mo long namba tri dei blong hem, hem i laef bakegen, olsem we Baebol i talem. Nao biaen, hem i kamtru long Pita, mo biaen, hem i kamtru long ol twelef man blong hem. Mo biaen, hem i kamtru long wan kampani blong ol man blong hem we oli moa long faef handred man, nao olgeta evriwan oli luk hem wantaem. Sam long kampani ya oli ded finis, be bighaf blong olgeta oli stap laef yet.”—1 Korin 15:4-8.

?Olsem wanem? ?I impoten we ol Kristin ya oli bilif long merikel ya? Pol i gohed i se: “Sipos hem i no laef bakegen, hemia i min se mifala i stap talemaot gud nius ya, be blong nating nomo, mo yufala i stap bilif, be blong nating nomo tu.” (1 Korin 15:14) Long tingting blong Pol, merikel ya i impoten tumas. Pol i save se merikel ya i tru, from we plante man oli bin luk samting we i hapen long taem ya. Mo ol man ya oli rere blong ded from bilif blong olgeta, i bitim we oli talem se oli no luk merikel ya.—1 Korin 15:17-19.

NAMBA TRI TINGTING: Ol man we oli no gat save, oli luk sam samting olsem graon i seksek mo bigfala wota i ron, be oli no kasem save long olgeta, ale oli talem se hemia merikel. Sam man we oli skul gud, oli talem se ol merikel we Baebol i tokbaot oli ol samting raonabaot long yumi we oli hapen olsem nomo, be oli no kamaot long paoa blong God. Oli ting se samting ya bambae i mekem i isi blong ol man oli bilivim ol stori long Baebol. I tru se long sam merikel i gat graon i seksek, ol bigfala sik, mo graon i brokbrok. Be i gat wan samting we ol man ya oli no tingbaot. Hemia stret taem we Baebol i talem se merikel i hapen long hem.

Yu traem tingbaot fas trabol we God i mekem long Ijip, taem Nael Reva i jenis i kam blad. Samfala oli talem se red graon nomo we wota i wasemaot mo ol smosmol red bebet, oli mekem se reva i kam red. Be Baebol i talem se reva i kam blad, i no kam sofmad we i red. Taem yumi ridim gud Eksodas 7:14-21, yumi luk se merikel ya i kamaot taem Eron i kilim wota blong Nael Reva long wokingstik blong hem. Nating sipos toktok blong ol man ya i tru no i no tru, be reva i jenis stret long taem we Eron i kilim. !Hemia wan merikel ya!

Yu traem tingbaot wan narafala stori we i soemaot stret taem we merikel i hapen long hem. Hemia taem ol man Isrel oli rere blong go long Promes Lan. Jodan Reva i ron bigwan, nao ol man Isrel oli no save gokros long hem. Baebol i talem se: “Long semtaem ya we ol pris ya oli purumbut long wota, wota ya i no moa ron. Haf wota ya we i stap ron i kamdaon, hem i stap fulap longwe, klosap long taon ya Adam.” (Josua 3:15, 16) ?Olsem wanem? ?Samting ya i hapen from we graon i seksek no i brokbrok? Baebol i no talem, be merikel ya i hapen long stret taem we Jehova i talem.—Josua 3:7, 8, 13.

?Olsem wanem? ?Ol merikel oli save hapen? Yes, Baebol i talem se oli save hapen. Hem i soemaot se oli no ol samting raonabaot long yumi we oli hapen olsem nomo. Taswe, i no stret blong talem se ol merikel oli no save hapen from we yumi no stap luk evri dei.

[Futnot]