Baebol i Ansa
?Bambae i save gat wan gavman nomo long fulwol?
?Olsem wanem wan gavman blong man i save mekem olgeta man oli joen gud? Aesea 32:1, 17; 54:13
Yu traem tingbaot olsem wanem wan gavman blong wol i save givhan long ol man. Tede plante man oli harem nogud, from we samfala oli pua tumas, mo samfala oli rij tumas. Be wan gavman we i luksave nid blong evri man, bambae i meksua se evri man oli kasem ol samting we oli nidim. ?Yu yu ting se ol man oli naf blong putumap wan gavman olsem?—Ridim Jeremaea 10:23.
Stat bifo finis i kam, ol gavman oli no naf blong lukaot long ol man we oli rul long olgeta, speseli olgeta we oli pua. Sam gavman oli mekem i nogud long ol man. (Prija 4:1; 8:9) Be God ya we i Hae olgeta, i promes blong putum wan gavman we bambae i tekem ples blong evri gavman blong wol ya. King blong gavman ya bambae i lukaotgud long evri man.—Ridim Aesea 11:4; Daniel 2:44.
?Kingdom blong God bambae i mekem wanem?
Jehova God i jusumaot finis wan man we stret gud, blong kam King blong wol ya. Hemia Pikinini blong hem, Jisas. (Luk 1:31-33) Taem Jisas i laef long wol, hem i soemaot finis se hem i intres blong givhan long ol man. Olsem wan King, bambae hem i mekem se olgeta man oli joen gud, mo bambae i no moa gat trabol we i mekem man i harem nogud.—Ridim Ol Sam 72:8, 12-14.
I no evri man we oli glad blong letem Jisas i Rulum olgeta. Be Jehova i gat longfala tingting yet. (2 Pita 3:9) Hem i givim janis long ol man blong oli glad blong letem Jisas i Rulum olgeta. I no longtaem, Jisas bambae i spolem ol nogud man mo bambae hem i putum pis mo sekiuriti long fulwol.—Ridim Maeka 4:3, 4.