?I Gat Wan Man i Stap Lesin Long Ol Prea?

Sam man oli harem se taem oli prea oli stap westem taem nomo, from we i no gat man i stap lesin. Sam narafala oli prea be oli no kasem ansa blong prea blong olgeta. Wan man we i no bilif long God, i mekem wan pija blong God long tingting blong hem mo i prea se: “Yu traem toktok long mi blong mi harem yu.” Be hem i talem se God “i stap kwaet nomo.”

Be Baebol i talem se i gat wan God i stap mo hem i stap lesin long ol prea. Baebol i talem se: “Hae God, hem i God we i gat sore long man, mo sipos yufala i krae i go long hem, hem bambae i harem yufala, mo bambae i givhan long yufala.” (Aesea 30:19) Wan narafala vas i talem se: “Taem ol gudfala man oli prea, Hae God i glad blong harem olgeta.”—Ol Proveb 15:8.

Mo tu, Baebol i tokbaot ol man we God i harem prea blong olgeta. Wan vas i talem se Jisas i ‘askem ol samting long God we i gat paoa blong sevem hem’ mo “God i harem hem.” (Hibrus 5:7) I gat sam narafala eksampol long Daniel 9:21 mo 2 Kronikel 7:1.

Taswe, ?from wanem sam man oli harem se God i no ansa long ol prea blong olgeta? From we blong God i ansa long olgeta, oli mas prea nomo long God ya we Baebol i tokbaot, hemia Jehova.a Be i no long ol narafala god no ol bubu blong bifo we oli ded finis. Mo tu, God i wantem se yumi “askem samting long hem we i stret long tingting blong hem.” God i talem se sipos yumi prea olsem, “hem bambae i harem prea blong yumi.” (1 Jon 5:14) Taswe, blong God i harem prea blong yumi, yumi mas save God ya we Baebol i tokbaot mo kasemsave samting we hem i wantem.

Plante man oli bilif se taem oli prea, God i stap lesin mo i ansa long olgeta, nomata se oli go long jos no nogat. Wan man Kenya we nem blong hem Aesak, i talem se: “Mi prea blong God i givhan long mi blong kasemsave long Baebol. I no longtaem, wan man i kam luk mi mo i stadi Baebol wetem mi.” Long Filipin, Hilda i wantem stop blong smok sigaret. Hem i traehad plante taem finis be i no save winim, nao man blong hem i talem long hem se, “i gud yu prea blong God i givhan long yu.” Hem i mekem samting we man blong hem i talem mo i se: “Mi mi sapraes tumas blong luk olsem wanem God i givhan long mi. Mi harem se mi no moa wantem smok mo afta mi lego fulwan.”

God i save givhan long yu blong winim ol problem blong yu, sipos yu askem samting we i laenap wetem tingting blong hem.