Tijim Ol Pikinini Long Rod Blong Laef
1 Sipos yumi obei long ol tok we God i talem, bambae yumi kasem laef—sipos yumi no obei long loa blong Hem, bambae yumi harem nogud mo yumi ded. Stori blong Adam mo Iv i tijim yumi long bigfala lesen ya we i no had blong kasem save long hem. Sipos tufala i obei oltaem long God, tufala i save laef gogo i no save finis. Be tufala i jusum blong brekem loa blong God nao tufala i ded from. Olgeta Kristin papa mama oli mas traem tingting gud long ol kwestin ya: ?Wanem tijing we mi mi stap givim long ol pikinini blong mi? ?Mi mi stap soem long olgeta wanem blesing we oli save kasem sipos oli obei, mo wanem nogud frut i save kamaot sipos oli no obei? ?Mi mi stap tijim olgeta blong lavem Jeova wetem fulhat blong olgeta? ?Eksampol blong mi i stap lanem olgeta long wanem samting?
2 Yu No Mas Stretem Olgeta Olbaot Nomo: Blong tijim pikinini blong obei, i gud we ol papa mama oli putumap sam klia rul we oli no strong tumas, blong lidim ol pikinini long ol fasin we oli mas mekem long laef blong olgeta. Ol papa mama, yufala tu i mas obei long ol rul ya, nao bambae oli luk gudfala eksampol blong yufala. Givim woning long olgeta se sipos oli brekem ol rul ya bambae yufala i mas panisim olgeta. Yufala i no mas slo blong folem tok ya, i nogud we yufala i toktok tumas, singaot strong long olgeta, mo stretem olgeta olbaot nomo. (Efes. 6:4) Papa mama tugeta i mas agri long ol rul blong stretem pikinini, mo tufala evriwan i mas folem ol rul ya, olsem nao pikinini bambae i gat respek long tufala. Taem papa mama i stretem pikinini wetem lav, pikinini i lanem se bambae hem i kasem panis sipos hem i minim nomo blong mekem samting we i no stret. Be hem i mas lanem tu se sipos hem i obei, bambae hem i haremgud from we papa mama bambae i talem ol gudfala toktok mo givim presen long hem. (Efes. 6:1-3; Hib. 11:6) Sipos yu tijim ol pikinini blong yu taem oli smol se ‘oli mas kakae frut blong sid we oli planem,’ bambae yu blokem plante trabol mo maet ded tu, we i save kasem olgeta.—Gal. 6:7; Prov. 23:13, 14.
3 Blong obei, yumi mas lesin. ?Olsem wanem? ?Yu yu stap tijim pikinini blong yu blong lesin? ?Hem i kasem save se hem i mas go long miting mo hem i mas lesingud? Sam papa mama oli tijim pikinini long haos, blong i lesingud. Oli makemaot taem blong ridim buk long pikinini blong olgeta. Oli mekem pikinini i sidaon kwaet mo i lesingud. Sipos oli tij wetem longfala tingting, sloslo pikinini bambae i lanem blong lesingud mo putum tingting blong hem i stap long miting nomo, we i no letem ol samting raonabaot long hem oli pulum ae blong hem. Bakegen, papa mama i mas givim eksampol. Long miting, tufala i no mas letem ol samting i pulum ae blong tufala mo luklukraon evritaem i gat wan smosmol noes. Mo tu, ol yangfala oli laekem blong givim ansa long miting. Sipos oli reregud long wan no tu ansa we oli no ridim be oli talem long prapa toktok blong olgeta, bambae oli lesin moa, mo bambae oli haremgud long miting. Mo tu, sipos yu talem long ol pikinini blong yu blong faenem ol vas blong Baebol we ol brata oli yusum long tok blong olgeta, samting ya i save halpem olgeta blong stap wekap mo lesingud, mo bambae oli lanem blong faenem ol vas tu.
4 Sam pikinini oli sidaon kwaet blong wan aoa, be biaen oli stat muvmuf mo mekem noes. Maet oli tanraon blong lukluk ol brata sista we oli sidaon biaen long olgeta, mo oli traem pulum ae blong olgeta. Maet oli karem sam pleplei i kam long miting, nao oli mekem noes we i blokem ol narafala oli no save lesingud. Yumi no mas fogetem se long Isrel bifo, Jeova i talem long “ol pikinini” tu se oli mas kam wanples wetem ol narafala blong “harem” tok blong God mo “lanem” samting. (Dut. 31:12) Long miting, sam pikinini oli traem faenem eskius blong wokbaot, ale oli go kam long tolet mekem se ol narafala oli no save lesingud. Be long haos, ol semfala pikinini ya oli pleplei blong plante aoa we oli no nid blong go long tolet nating. Sipos ol papa mama oli mekem se pikinini i go long tolet bifo we miting i stat, ating i no gat nid blong oli meknoes taem miting i stap gohed.
5 Putum Ol Tiokratik Mak We Pikinini i Save Wok From: Blong tijim pikinini long rod blong laef, yu mas stat taem hem i smol nomo, blong rerem tingting blong hem blong mekem wok blong God taem hem i kam bigwan. Givhan long hem blong luksave olsem wanem hem i save kam olsem Jeremaea, Esikel, Aesea, mo ol narafala we oli yusum laef blong olgeta long wok blong Jeova. Mekem hem i save long ol nambawan janis we hem i gat tede blong mekem wok blong Kingdom blong God. Tokbaot oltaem, gudfala eksampol blong Jisas Kraes, we i livim samting we hem i wantem blong mekem wok blong God. Leftemap tingting blong pikinini blong prea oltaem long Jeova wetem fulhat blong hem. Mo antap long olgeta samting ya, soem gudfala eksampol long hem—nao hem i save luk bigfala glad we yu yu kasem taem yu mekem wok blong God wetem fulhat blong yu. Ale taem pikinini blong yu i talem se hem i wantem givim laef blong hem i go long Jeova mo tekem baptaes, bambae yu yu glad we yu glad from we yu nao yu bin halpem hem blong tekem disisen ya.