Ansa Long Wan Kwestin
◼ ?Olsem wanem blong soemaot se yumi glad blong luk ol man taem oli tekem baptaes?
Baptaes i wan taem blong harem gud. Yumi glad blong luk ol nyuwan oli stanap strong long saed blong Jeova, mo oli soemaot bilif blong olgeta long plante man taem oli tekem baptaes. (Sam 40:8) Jisas i talem se bigfala glad i kamaot long heven from. (Luk 15:10) Ol famle mo ol pablisa we oli stadi wetem olgeta we oli tekem baptaes oli glad tumas blong luk se ol nyuwan oli mekem impoten samting ya. ?Be, olsem wanem blong soemaot glad blong yumi long fasin we i stret?
Baptaes blong Jisas i givim eksampel long ol Kristin we oli baptaes tede. Jisas i tingtinggud se samting we bambae hem i mekem i wan impoten samting mo i wan bigfala samting long laef blong hem. Hem i stap prea taem hem i baptaes. (Luk 3:21, 22) Hem i save se baptaes i wan taem blong tingting dip mo i taem blong tinghevi long hem. Ol disaepol blong hem tu oli luksave olsem wanem baptaes i impoten. Taem tabu speret i kafsaed long ol disaepol blong hem long dei blong Pentekos long 33 K.T., samwe long 3,000 man oli tekem baptaes. ?Olsem wanem long fasin blong ol disaepol we oli luk samting ya? “Oltaem olgeta ya oli stap lesin long ol tok we ol aposol oli stap tijim olgeta long hem, mo oli stap joen long kampani blong olgeta. Oli stap joen blong brekem bred, mo blong mekem prea, mo oltaem oli strong long ol fasin ya.” (Wok 2:41, 42) Ol disaepol oli tingbaot ol samting long saed blong speret mo oli stap tekem olgeta i go long haos blong olgeta wanwan.
Baptaes i wan bigfala samting we i makem ol asembli blong ol Kristin tede. Hem i stret nomo blong klaphan mo yumi toktok gud wetem olgeta we oli tekem baptaes blong soemaot se yumi glad. Be, fasin blong singsingaot, no wesil, no saksakem han antap long hed mo fasin blong singaot nem blong olgeta, i no stret. Fasin olsem i soemaot se yumi no stap tinghae long ol impoten taem ya, taem ol man oli soemaot bilif blong olgeta. Long taem ya tu i no stret blong pulum ae blong ol man from we yumi wantem givim ol flaoa no ol presen long olgeta we oli tekem baptaes taem oli kamaot long wora. Baptaes i stat blong Kristin resis long rod ya blong kasem sef. Blong soemaot glad mo leftemap tingting blong olgeta we oli tekem baptaes, yumi save givhan long olgeta blong oli frengud wetem Jeova naoia, taem baptaes i openem rod long olgeta.
Ples blong baptaes i no ples blong tok plei, pleplei, no blong swim, no sam narafala fasin we i save spolem tingting blong ol man blong no respektem taem olsem. Yumi mas soemaot glad blong yumi long fasin we i stret. Sipos yumi no olbaot long fasin blong yumi mo yumi stap tinghae long samting ya bambae olgeta we oli stap long taem ya oli save glad from.