Gohed Blong Talem Se: “Yu Kam!”
1 Wan nambawan rod tumas we Jeova i mekem tru long ransom sakrifaes blong Jisas! Long rod ya yumi faenem olgeta samting we i nidim blong mekem ol man oli glad. (Jon 3:16) Be, sore tumas blong talem se, smol man nomo oli save mo bilif strong long trutok ya. Be yet, long lav blong hem long ol man, Jeova i mekem plan blong gud nyus ya i kasem olgeta man long olgeta ples. Tru pikinini blong hem, Jisas Kraes, hem i givim jans blong evriwan blong faenem glad mo hop blong laef we i no save finis.—Jon 3:17.
2 Blong plante taosen yia, oli no save mak we i soemaot wan we bambae i pemaot sin mo ded blong ol man. Hem i wan “tok haed” gogo kasem Jisas Kraes i kam mo “nao long gud nyus ya, hem i tekem laef i kamtru we i no save finis.” (Rom 16:25; 2 Tim. 1:10) Ol man we oli folem Jisas, oli mekem long wok ya blong talemaot gud nyus long faswan handred yia; nao yumi we yumi stap laef long taem blong yumi naoia yumi gat nambawan jans blong talemaot semfala gud nyus ya. Taem yumi stap talemaot mesej blong Kingdom, yumi stap joen wetem Jeova, Jisas Kraes, mo ol brata blong Kraes, we oli stap askem ol man blong olgeta ples taem oli talem se: “Yu kam! . . . tekem wora ya blong laef we i olsem presen blong yu.”—Rev. 22:17.
3 I tru, i no evriwan we bambae oli lesin long gud nyus ya. Smol man nomo oli lesingud long hem. Sam oli sakem strong tok agensem ol man blong wok blong God, we oli stap singaotem olgeta blong haremgud long wora blong trutok we i save givim laef. Nating se i olsem, wetem paoa we i kam long Jeova, yumi stanap strong long wok ya. Yumi save se fasin blong yumi blong wantem talemaot tru tok mo blong halpem olgeta kaen man we i wantem lesin i mekem Jeova i glad mo hem i blesem yumi from.
4 Long minista wok blong yumi long Maj, bambae yumi leftemap tingting blong ol man we oli stap lukaotem tru tok blong ridim buk ya Revelation Climax mo glad long hop we buk ya i stap talemaot. Bambae oli kasem plante blesing taem oli mekem olsem. Antap moa, buk blong Revelesen i stap tokbaot fyuja—fyuja blong olgeta mo blong yumi tu. Samfala we naoia oli givim laef blong olgeta finis long Jeova, fastaem oli stat intres long tru tok taem oli ridim insaed long sam buk blong Sosaeti we i eksplenem buk blong Revelesen. I no longtaem i pas yumi stadi gud long olgeta haf blong buk ya Revelation Climax, from samting ya yumi luk save se hem i impoten tumas long ol man we hat blong olgeta i stret mo oli hangri long trutok. Taem yumi faenem ol man olsem long minista wok blong yumi, bambae yumi traem soemaot wan no tu poen long buk Revelation Climax blong soem ol gudfala samting we oli stap long hem. Moa tu, yumi save soemaot ol profet tok we buk ya eksplenem klia nomo we oli stap kam tru long taem blong yumi, olsem saen blong ol man blong resis long hos we Revelesen japta sikis i tokbaot.
5 I stret moa blong yumi tokbaot ol gudfala samting we Jeova i mekem long ol man taem yumi stap rere blong mekem memoriol blong tingbaot ded blong Kraes long namba 6 Epril. Nating se ol man oli jusum blong lesin no nogat, yumi mas stanap strong long wok ya we God i givim long yumi blong talemaot tok ya long ol kaen man we oli wantem, se: “Yu kam! tekem wora ya blong laef we i olsem presen blong yu.”