Rere Blong Jenisim Tok Long Minista Wok Blong Yumi
1 Oli talem se ol defren samting oli mekem laef i gud. Plante taem, wan defren fasin blong tokbaot wan poen i save mekem ol man oli laekem moa. Samting ya i semak long minista wok blong yumi. Sipos yumi no lukaotgud, ol tok blong yumi long ol haos wanwan i save kam olsem wan teprikoda. Talem sem fastok bageken mo bageken i save mekem yumi mo ol man blong haos i kam taed long hem. Taswe, yumi mas rere blong jenisim tok blong yumi long minista wok blong yumi. ?Be, olsem wanem yumi save mekem samting ya?
2 Maet yumi save talem samting we i defren moa long tok olsem, “Gud moning. Mifala i stap storeyan long ol man raonabaot long mifala long gud nyus blong Kingdom,” traem tingbaot ol fasin blong jenisim ol fastok blong yu. Insaed long Reasoning buk i givim plante defren rod blong statem fastok. Long pej 9-15, i gat ol fastok long 18 defren poen. Mo i gat tu, tri, no i gat moa fastok long plante long ol poen ya.
3 Sipos yu stap yusum buklet ya, “God i Rili Kea Long Yumi?,” fastok long haf ya “Laef/Glad” (Life/Happiness) long pej 13 i save halpem yu:
◼ “Mifala i stap storeyan wetem ol man we oli rili wari long fasin blong laef tede. ?Plante oli stap tingting sipos i save gat wan trufala glad laef? Buklet ya i save givim sam wan gudfala poen blong tingbaot.” Openem buklet long pej 25, mo ridim wan no tu poen long haf 15 mo 16.
4 Sam pablisa blong Kingdom antap moa ol yangfala no ol nyuwan, be ol olfala wan tu, oli faenem se oli save mekem ol gudfala fastok long doa blong man taem oli yusum ol traket.
Wan yangfala pablisa maet i save yusum traket ya “Haremgud Long Famle” mo talem se:
◼ “Mi gat wan smol mesej blong yu we i soem olsem wanem God i save mekem ol famle oli joen wanples long glad. Mi wantem givim traket ya long yu we nem blong hem Haremgud Long Famle.” Pablisa we i bigman finis mo i wok wetem yangfala pablisa ya i save luksave sipos hem i save talem sam moa tingting no tok, i dipen long fasin blong man blong haos.
5 Sipos man blong haos i soem intres, pablisa we i big man finis i save talem se:
◼ “Baebol i givim ol advaes long stret wok blong wan hasban, waef mo ol pikinini insaed long famle. From we God i stampa blong famle, ?yu no agri se hem i stap long stret ples blong talem long yumi olsem wanem famle i mas wok? Mi wantem save tingting blong yu long ol stret advaes blong Baebol long ol memba blong famle.” Nao ridim Efesas 5:22, 23, 28-31.
6 Sipos yu stap seremaot Revelation Climax buk, i gud blong tokbaot gudfala fyuja we i stap long Revelesen 21:3, 4. Afta ridim haf 7 long pej 303 we i stap long buk. Askem long man blong haos sipos i tru we God bambae i mekem promes ya i kamtru. Smol storeyan long ol profet tok blong Baebol we oli kamtru finis i mas mekem man blong haos i trastem paoa blong God blong sevem ol man.
7 Olgeta man blong talemaot Kingdom oli wantem joen blong mekem Tiokratik intres i go moa, taem oli planem ol sid blong trutok long ol ples we oli save mekem long hem mo taem oli wok long intres we man i soem. Taem yumi mekem haf blong wok blong yumi, yumi save glad blong livim ol narafala samting blong mekem man i gru long fyuja i go long han blong Jeova. Yumi gat wan nambawan nyus blong seremaot long ol man we oli stap raonabaot long yumi. Taem yumi reregud oltaem, yumi save talemaot mesej blong Kingdom long wan fasin we i isi mo man i save bilif long hem.