Yearbook—Wan Nambawan Samting Blong Leftemap Tingting
1 Ol ripot mo ekspiryens long saed long ol gudfala wok blong Jeova oli wan samting we oltaem mekem ol man blong wok blong Jeova oli haremgud. (Job 38:4, 7; Prov. 25:25; Luk 7:22; Ol Wok 15:31) Hemia from wanem Yearbook of Jehovah’s Witnesses i wan nambawan samting blong leftemap tingting.
2 Evri Yearbook i givim ol ripot we oli kamaot long olgeta ples long wol long saed blong wok mo ol samting we ol Wetnes blong Jeova oli stap mekem, ol ripot ya oli leftemap tingting blong yumi. Ol ekspiryens we oli mekem bilif i strong oli soemaot olsem wanem Jeova i stap lidim, protektem, mo blesem ol man blong Hem. Yearbook i tokbaot ol man mo woman we oli strong i naf blong lego famle, ol fren mo kantri blong olgeta blong karem trutok blong Baebol i go long ol man blong ol kantri mo bighaf blong ol aelan long solwora.
3 Yearbook i bin pusum plante man we oli stap ridim blong mekem moa long wok blong God. Wan woman we i stap ridim buk ya i raetem se: “Mi no save ridim buk ya kwik tumas. Wanem we mi ridim kam kasem naoia hem i leftemap tingting blong mi bigwan. Hem i mekem mi mi harem se mi save mekem moa long wok blong talemaot gud nyus taem mi luk wanem we ol narafala oli stap mekem nating se oli kasem trabol.”
4 Evri yia stat long 1927 finis, Yearbook of Jehovah’s Witnesses i bin stap olsem wan nambawan samting we i givim ol ripot mo ol ekspiryens we oli gat bigfala paoa long olgeta we oli ridim. ?Yu yu stap haremgud fulwan from spesel samting ya blong leftemap tingting? Blong mekem olsem, yu mas sua blong ridim Yearbook taem yu jes kasem. Afta, taem yia i gohed, lukluk bakegen long sam stret haf blong hem, blong leftemap tingting blong yu mo famle blong yu, stret olsem we yufala i nidim.