Advaes

◼ Buk blong seremaot long Janewari: Eni buk we i gat 192 pej long hem we oli lusum kala lelebet no eni buk we oli prentem bifo 1980. Ol kongregesen we oli no gat ol buk ya oli save seremaot Mankind’s Search for God. Febuwari: Yu Save Laef Foreva Long Paradaes Long Wol. Maj: Revelation​—⁠Its Grand Climax At Hand! Epril mo Mei: Wajtaoa mo Wekap! magasin, mo eni narafala buklet (be no buklet blong School). Long ol ples we yumi faenem intres long hem taem yumi mekem visit bakegen, yumi save askem man blong mekem sabskripsen. NOTIS: Ol kongregesen we oli nidim ol buk ya we yumi tokbaot antap, oli save putum long oda blong olgeta blong nekis manis long fom (S(d)-14). Ol olfala buk blong seremaot long Janewari oli no gat long Bruklin, be ol kongregesen oli save yusum olgeta we oli stap finis long stok blong olgeta.

◼ Ol kongregesen oli mas mekem ol stret plan blong mekem lafet blong Memoriol, long yia ya long Sarede, Maj 26, afta we san i godaon finis. I gud blong wanwan kongregesen blong mekem Memoriol olgeta nomo, be samtaem maet oli no save mekem olsem. Long ol ples we sam kongregesen oli yusum sem Haos Kingdom, wan no moa kongregesen oli save faenem wan narafala ples blong yusum long sapa ya. Memoriol i no mas stat let tumas, blong mekem se ol nyuwan we oli intres oli faenem i had blong stap long miting ya. Mo tu, taem blong wan miting i finis mo narawan i stat i no mas kolosap tumas blong mekem se i no gat taem bifo mo afta long miting blong talem halo long ol visita we oli kam, mekem plan blong givhan long sam blong gohed long saed blong speret, no olgeta we oli stap long taem ya oli save toktok wetem wanwan long olgeta blong leftemap tingting blong olgeta. Afta we oli tingtinggud long ol samting, ol elda oli mas faenemaot wanem plan i gud blong halpem olgeta we oli kam long Memoriol blong haremgud fulwan long taem ya.

◼ Stat long Febuwari i go, mo i no bitim Maj 6, nyufala pablik tok blong ol seket elda bambae stampa blong hem: “Ol Man We God i Wokem Olgeta Oli Stap Mekem Noes Olsem We Oli Harem Nogud​—⁠?Wetaem Bambae Samting ya i Finis?”

◼ Spesel pablik tok blong taem blong Memoriol long 1994 bambae oli givim long olgeta ples long wol long Sande, Epril 10. Stampa tok blong hem se “Trufala Skul i Fulumap Nid Blong Ol Man”. Bambae oli givim pepa blong tok. Ol kongregesen we oli gat visit blong seket elda, wan seket asembli, no wan spesel dei asembli long wiken ya bambae oli gat spesel tok blong olgeta long wik we i kam biaen. I no mas gat kongregesen we i givim tok ya bifo long Epril 10.