Tok Blong God i Gat Paoa
1 Baebol i gat bigfala paoa long laef blong plante milyan man finis. Wanem we hem i talem i save pusum man moa bitim eni samting we man i save wokem. (Hib. 4:12) Tingbaot wanem i bin mekem long yumi. I tru, Baebol i nambawan bitim eni narafala buk.
2 Ol Wetnes blong Jeova oli nambawan studen blong Baebol mo man blong tokbaot Baebol. Yumi mas tingbaot fasin blong ridim Baebol olsem wan samting we yumi nidim olsem haf blong tiokratik program blong yumi, putum hem long fasples bitim lukluk televisin mo ol narafala samting we yumi wantem mekem blong spel.
3 Mekem Evri Dei: Ol man blong Jeova oli save olsem wanem fasin blong ridim Baebol evri dei i gat paoa long olgeta. Blong plante yia finis wan bigfala saen we i stap long wan long ol bilding blong Sosaeti long Bruklin i bin talem long ol man we oli stap pas long ples ya blong “Ridim Tok Blong God Tabu Baebol Evri Dei.” Oli askem ol nyufala memba blong famle blong Betel blong ridim ful Baebol long faswan yia blong olgeta long wok blong Betel.
4 Nating se laef blong yu i bisi tumas, ?yu yu stap ridim Baebol riding blong evri wik we i stap long Program Blong Tiokratik Skul? Sipos yu bin faenem i had blong mekem samting ya, i gud blong stretem program blong yu blong stat ridim Baebol long Novemba. Baebol riding blong ful manis hem i Ol Sam 95 kasem 109, ale yu nidim blong ridim tri no fo pej evri wik. Samfala oli jusum blong ridim smosmol evri dei, maet long eli moning no bifo oli go slip long naet. Nating se wanem rod yu folem, impoten samting se yu save kasem gudfala samting taem yu ridim Tok blong God oltaem.
5 Seremaot Baebol Long Novemba: Plante man oli gat respek yet long Baebol mo oli rere blong lesin taem yumi ridim. Long Novemba bambae yumi seremaot New World Translation mo buk ya The Bible—God’s Word or Man’s? Hemia wan nambawan jans blong soemaot long ol man we hat blong olgeta i stret olsem wanem Tok blong God i gud tumas. Yu mas glad blong mekem samting ya.
6 Rere long sam poen blong tokbaot ol gudfala samting long New World Translation we bambae i pulum intres blong ol man blong karem wan. Soemaot olsem wanem i save givhan long laef blong olgeta. Yu save soem wan poen long haf ya “Bible Topics for Discussion” mo joenem wetem buk ya The Bible—God’s Word or Man’s? No maet yu save soem pej 92 indeks blong ol tok blong Baebol long pej 92, soem olsem wanem i save givhan man we i ridim blong faenem ol vas we hem i savegud. Maet sam pablisa oli wantem tokbaot “Appendix” no “Table of the Books of the Bible,” soem olsem wanem i givhan taem yu stadi Baebol.
7 Mekem sua blong soemaot se New World Translation i stap long Engglis mo Franis blong tede, we i mekem i isi blong kasem save long hem. Sam vas we i gud blong skelem wetem King James Version hemia 1 Korin 10:25 mo 16:22. New World Translation i yusum nem blong God, Jeova, 7,210 taem.
8 Yes, Baebol i Tok blong God. Sipos yumi ridim, bilif long hem, mo mekem ol advaes blong hem oli wok long laef blong yumi bambae yumi kasem gudfala samting from. Hem i blong tijim mo givim hop long yumi. (Rom 15:4) I nidim blong yumi ridim evri dei blong yumi save rere blong yusum blong tijim ol narafala man.