Wan Eksampel We Yumi Mas Folem
1 I klia se Jisas i man we i hae moa long olgeta man. Hem i soem long ol disaepol blong Hem wan eksampel we i stret olgeta. Nating se yumi no save kasem nambawan mak blong Hem, Baebol i pulum tingting blong yumi blong yumi “biaen long hem.” (1 Pita 2:21) Yumi wantem tumas blong kam sem mak long Jisas olsem yumi naf blong mekem, yes blong yumi gat strong tingting blong serem trutok wetem ol narafala.
2 Jisas i no wan man blong talemaot gud nyus nomo, be hem i nambawan tija tu. “Ol man oli sapraes long ol tok blong hem.” (Mat. 7:28) ?From wanem hem i save karem gud frut olsem? Yumi save luklukgud long “ol tok blong hem.”
3 Olsem Wanem Yumi Save Biaen Long Jisas: Papa blong hem i tijim hem gud. (Jon 8:28) Hem i laekem blong givim ona long Jeova mo blong leftemap nem blong Hem. (Jon 17:4, 26) Taem yumi prij mo tij yumi mas gat mak ya blong ona long Jeova, be i no blong mekem man i tingbaot yumi.
4 Ol tijing blong Jisas oli stanap long Tok blong God. Oltaem hem i tokbaot wanem oli raetem long Tok blong God. (Mat. 4:4, 7; 19:4; 22:31) Yumi wantem pulum tingting blong ol man i go long baebol; nao yumi soem long olgeta se wanem yumi stap prij mo tij i stanap long Bigfala Man.
5 Jisas i yusum ol tok we oli sotfala, we oli gat paoa long laef mo isi blong kasem save. Olsemia nao, hem i leftemap tingting blong yumi blong gat fasin blong fogivim ol narafala, taem hem i soem wanem yumi mas mekem, blong God i save fogivim yumi tu. (Mat. 6:14, 15) Yumi mas traem blong talemaot mesej blong Kingdom long ol tok we oli isi, we ol man oli save kasem save long olgeta.
6 Jisas i yusumgud ol pijatok mo ol kwestin blong wekemap tingting blong ol narafala. (Mat. 13:34, 35; 22:20-22) Ol pijatok long saed blong ol samting we oli kamaot evri dei, oli save givhan long ol man blong kasem save long ol strong tijing blong Baebol. Yumi mas askem ol kwestin we oli pusum man blong tingbaot ol samting we oli harem. Ol gudfala kwestin oli save givhan long olgeta blong kasem poen stret.
7 Jisas i tekem taem blong eksplenem ol strong samting long olgeta we oli wantem kasem moa save. Olgeta we oli rili intres, olsem ol disaepol blong hem, oli save kasem mining blong ol samting we Jisas i tijim. (Mat. 13:36) Long sem fasin, yumi mas givhan long ol man we oli glad blong askem kwestin long yumi. Sipos yumi no save ansa blong ol kwestin ya, yumi save jekem fastaem nao yumi save kambak bakegen wetem ol ansa we yumi faenem.
8 Jisas i tijim from ol fasin blong hem. Olsemia nao: hem i wasem leg blong ol disaepol blong hem, nating se hem i Masta blong olgeta. (Jon 13:2-16) Sipos tingting blong yumi i stap daon olsem hem, samting ya i save pusum ol man we yumi stap tijim olgeta, blong mekem ol samting we oli lanem.
9 Jisas i wantem kasem hat blong ol man mo fasin blong olgeta blong laekem fasin stret. Yumi wantem kasem ol hat tu. Taem ol man oli bon oli gat fasin ya blong mekem wosip long wan man we i hae moa long olgeta. Oli wantem haremgud mo laef long pis wetem ol narafala. Yes, yumi wantem kasem fasin ya we i stap insaed long olgeta.
10 Long Desemba, yumi save serem wetem ol narafala ol samting ya we yumi lanem finis long saed blong Jisas, taem yumi seremaot buk ya Man We i Hae Moa Long Olgeta Man. Sipos yumi folem fasin blong tijing blong Jisas, bambae samting ya i pulum ol gud man blong oli lesin taem yumi eksplenem ol samting we Jisas i tijim.—Mat. 10:40.