?From Wanem i Gud Tumas We Jeova i Stap Jekemap Yumi?
1 Yumi evriwan i wantem gud helt. Olsemia nao, yumi save haremgud moa long laef. Be, plante we oli gat gud helt, oli go luk dokta sam samtaem blong hem i jekemap olgeta. ?From wanem? Oli wantem faenemaot sipos i save gat wan trabol we i kamaot long helt blong olgeta, nao bambae oli save mekem wan samting blong blokem trabol ya. I impoten moa blong lukaotgud long helt blong yumi long saed blong speret. Blong mekem se Jeova i glad long yumi, yumi mas ‘stap strong oltaem long fasin blong bilif.’—Taet. 1:13.
2 Naoia i stret taem blong Jeova i jekemap yumi. ?From wanem? From we Jeova i stap long tabu haos blong hem, mo hem i stap skelemgud hat blong olgeta man. (Sam 11:4, 5; Prov. 17:3) Olsem Deved, yumi askem long Jeova blong jekemgud yumi: “Hae God, plis yu traem lukluk laef blong mi, blong faenemaot we mi mi man olsem wanem, yu traem skelem olgeta tingting blong mi wetem olgeta samting we mi mi wantem.”—Sam 26:2.
3 Yumi mas blokem ol samting we oli save mekem yumi sik long saed blong speret, ol samting insaed long yumi nomo, we oli kamaot from sin. Proveb 4:23 i givim advaes ya: “Samting we yu mas lukaot moa long hem i bitim ol narafala samting, se hat blong yu. Blokem ol samting we oli save kam spolem hat blong yu, from we hat hem i stampa blong laef.”
4 Mo tu, helt blong yumi long saed blong speret i save kam nogud from ol doti, rabis fasin blong wol raonabaot long yumi. Sipos yumi letem yumi blong kam kolosap tumas long ol fasin blong rabis wol ya, yumi save stat blong tingting olsem ol man blong wol mo stat blong folem ol fasin blong olgeta. Maet yumi stat folem wan fasin blong laef we i sem mak long ol man blong wol, nao speret blong wol i save winim yumi.—Efes. 2:2, 3.
5 Setan i save yusum ol man blong ronem yumi no blong agensem yumi stret, blong traem spolem yumi long saed blong speret. Be, hem i trikim yumi moa wetem ol samting blong wol we oli save pulum yumi. Pita i talem long yumi blong ‘lukaotgud mo rere,’ from we Setan i “olsem wan laeon we i stap singaot bigfala, i stap lukaot man blong i kakae.” Hem i talem long yumi blong ‘stanap strong long bilif blong yumi blong blokem hem.’—1 Pita 5:8, 9.
6 I impoten tumas we yumi lukaotgud long helt blong yumi long saed blong speret, mo mekem sam samting evri dei blong mekem bilif blong yumi i stap strong. Aposol Pol i talem se i gud blong traem bilif blong yumi oltaem. Long waes fasin, oltaem yumi folemgud ol advaes we wan gudfala dokta i givim long yumi. Olsem nao, yumi mas lesingud long Jeova tu, taem Hem i jekem yumi long saed blong speret, mo hem i soemaot wan poen we yumi mas stretem. Long rod ya, yumi save jenisim sam samting blong “kasem fasin we i stretgud olgeta.”—2 Kor. 13:5, 11.
7 Tru ya, Jeova i Bigfala Man Blong Skelem ol narafala. Oltaem samting we hem i faenemaot long saed blong ol man i stretgud. Hem i savegud stret samting we yumi nidim. Tru long Tok blong Hem mo ‘slef we i stret,’ hem i talem wanem kakae we yumi mas tekem long saed blong speret blong stap strong. (Mat. 24:45; 1 Tim. 4:6) Sipos yumi stap tekem gudfala kakae ya long saed blong speret oltaem long haos mo long ol miting blong kongregesen, yumi save stap strong long saed blong speret. Ol eksasaes long saed blong speret oltaem, olsem taem yumi prij mo mekem ol narafala Kristin wok, oli gud tu. Taswe, yumi glad tumas we Jeova i stap jekemap yumi, from yumi save se bambae hem i mekem yumi stap strong gud long saed blong speret.