Blong Stanap Strong​—⁠Yumi Mas Kam Oltaem Long Miting

¹ Aposol Pol i talem long yumi blong ‘mekem fasin blong bilif blong yumi i kam strong moa.’ (Taet. 1:​9, 13) Long ol miting blong kongregesen yumi tokbaot ol gudfala samting. Mo tu, yumi lanem olsem wanem blong werem oltaem olgeta klos blong faet long saed blong speret, blong yumi save “stanap strong agens long ol gyaman trik blong Devel Setan.”​—⁠Efes. 6:​11; Fil. 4:8.

² Ol Miting Oli Stret Long Ol Nid Blong Yumi: Blong yumi save stanap strong yumi mas kam oltaem long ol miting. (1 Kor. 16:13) Long ol miting, yumi prea blong talem tangkyu long God mo blong presem hem. Mo tu, yumi askem long God blong givhan long kongregesen mo lukaot long ol nid blong hem. (Fil. 4:​6, 7) Taem yumi joen long ol singsing blong Kingdom, samting ya i leftemap tingting blong yumi, mo i givhan long yumi blong soemaot ol filing blong yumi long wosip we yumi mekem i go long Jeova. (Efes. 5:​19, 20) Taem yumi storeyan gud tugeta bifo mo afta long ol miting long Haos Kingdom, samting ya i stap leftemap tingting blong yumi, i mekem yumi kam strong moa mo yumi haremgud.​—⁠1 Tes. 5:⁠11.

³ Long manis Epril long yia ya, i gat spesel tok ya, “En Blong Ol Gyaman Skul i Kolosap.” Hem i mekem ol man we oli laekem trutok oli luksave se i impoten tumas we oli kamaot kwiktaem long Bigfala Babilon. (Rev. 18:⁠4) !Long tufala manis Jun mo Julae, stadi long trifala haf blong Wajtaoa long saed blong ol bigfala laet we oli saenaot blong soemaot rod long ol stret man, oli rili pulum tingting blong yumi! (Prov. 4:18) Tingbaot ol samting we yumi save mestem sipos yumi no bin stap long ol miting ya.

⁴ Distrik Asembli blong yumi, “Ol Hapi Man Blong Presem God,” bambae i tokbaot nid blong kasem tijing we i save mekem minista wok blong yumi i kamgud moa. Olsem buk ya Ol Rul Blong Mekem Minista Wok Blong Yumi i soemaot long pej 72, Tiokratik Skul i wan rod we Jeova i yusum blong gohed blong tijim ful kongregesen. Naoia, wan haf blong miting ya i givhan long yumi blong save moa long ol buk blong Baebol, taem yumi yusum buk ya All Scripture. Yumi no mas mestem jans blong kasem ol tijing ya.

⁵ Miting Blong Kingdom Wok Blong Yumi i mekem yumi kam moa gud long minista wok blong yumi. Samting ya i kamaot klia long miting ya we i bin givim advaes long yumi olsem wanem blong seremaot Kingdom Nyus namba 34. Nambawan frut we yumi kasem long olgeta ples long wol i soem se Jeova i blesem wok ya bigwan. (Skelem wetem 2 Korin 9:⁠6, 7.) Olgeta we oli kam oltaem long ol miting oli kasem paoa, mo from samting ya, olgeta evriwan oli joen blong sapotem gud spesel wok ya.

⁶ Long Buk Stadi Blong Kongregesen, ol samting we yumi lanem long Tok blong God tru long Revelesen buk, oli halpem yumi blong luksave moa se yumi mas hareap blong finisim ol wok long smol taem we i stap. Ol samting oli stap jenis kwiktaem long wol ya, taswe yumi mas kasem save olsem wanem ol dip profet tok blong Revelesen oli kamtru.

⁷ Fasin Blong Kam Oltaem Long Miting i Mas Stap Long Fas Ples: Nating se long plante ples ol brata blong yumi oli stap safa from ol trabol, be oli luksave se i impoten tumas we oli joen wanples evri wik. Eksampel, long Burundi, Ruwanda, Laeberia, Bosnia, mo Hersegovina, i gat plante man we oli stat blong joen long ol miting. From samting ya, namba we oli kam i tu no tri taem antap long namba blong ol pablisa. Long rod ya, Jeova i givhan long ol brata blong stanap strong wetem wan tingting nomo.​—⁠Fil. 1:27; Hib. 10:​23-25.

⁸ Sipos sam long yumi oli bin slak blong kam oltaem long ol miting, oli mas traehad naoia blong jenisim fasin ya. (Ekles. 4:​9-12) Blong stanap strong, yumi nidim blong joen wetem olgeta we oli strong long saed blong speret. Olsem nao, yumi save givgivhan long yumi. Yumi mekem samting ya taem yumi kam oltaem long ol miting.​—⁠Rom 1:⁠11.