Ol Samting Blong Tiongbaot Bakegen Long Hot Taem
1 ?Yumi gat tingting blong mekem wanem long hot taem? Afta we hot taem ya i pas finis, ?bambae yumi save talem se yumi bin yusumgud, we yumi karem plante frut? Bambae yumi mekem olsem sipos yumi lesin long advaes ya blong yusum evri jans we yumi kasem. (Efes. 5:15, 16) Wan samting we yumi evriwan i mas putum long plan blong yumi, hemia blong kam long Spesel Dei Asembli long Janewari. ?Mo olsem wanem long wok blong prij?
2 Long hot taem ya, bambae yumi givimaot Revelesen buk. Long kongregesen blong yumi, yumi save sapotem wok blong prij we i stap long ol defren dei blong wik. Maet yumi save joen long wok blong prij long sapa, from we ol dei oli longfala moa long ol manis blong hot taem. Taem yumi tekem evri jans blong prij, yumi save pulum tingting blong ol man i go long buk ya. Sipos yumi stap longwe long kongregesen blong yumi, maet yumi save faenem Haos Kingdom long ples we yumi stap long hem, go long ol miting, mo joen long wok blong prij wetem ol brata mo sista long ples ya. Samting ya bambae i leftemap tingting blong yumi mo ol brata we yumi joen wetem olgeta.—Rom 1:12.
3 Sipos yumi no stap long prapa kongregesen blong yumi long en blong manis, yumi mas sanem ripot blong wok blong prij i go kwiktaem long sekretari, blong hem i save joenem long ripot we hem i sanem i go long Sosaeti long namba sikis blong nekis manis. Sipos yumi raetemdaon adres blong hem no mekemrere wan envlop fastaem, bambae yumi save sanem ripot blong yumi long stret taem.
4 Plante taem, namba blong ol Baebol stadi we ol pablisa oli mekem long hot taem i godaon, from we sam studen oli go spel. Maet hemia we i lidim stadi i go spel tu, be long wan defren taem. Yumi no mas letem ol wik oli pas we i no gat wan man blong lukaot long Baebol stadi blong yumi. Yumi save askem wan narafala long kongregesen blong lidim stadi ya taem yumi no stap. I gud we wan i mekem stadi ya evri wik. Samting ya bambae i makemgud long tingting blong studen se i impoten blong tekem kakae long saed blong speret oltaem. I gud sipos yumi evriwan i luklukbak long hot taem ya, we yumi harem se yumi bin yusum taem blong yumi long fasin we i waes, olsem ol man blong wok we oli givim laef blong olgeta finis long Jeova.