!I Gud Tumas We Yumi Kam Oltaem Long Ol Miting!
1 Long plante yia, long Is Yurop, gavman i blokem ol gudfala brata sista blong yumi blong holem ol miting wanples. !Traem tingbaot glad blong olgeta taem gavman oli tekemaot tabu ya, mo ol brata oli kam fri bakegen blong mekem ol miting!
2 Wan seket elda i tokbaot visit blong hem long wan kongregesen olsem. Hem i se: “Long Tusde naet, stret long taem we mi statem visit blong mi, ol mesin blong mekem ples i hot oli no moa wok. Afsaed, tempraja i godaon kolosap long 0, mo insaed, hem i stap long 5 digri nomo. Ol brata sista oli werem kot, oli putum kaliko blong kolkol raon long nek blong olgeta, oli putum hanglaf, hat mo but, mo oli stap sidaon. I no gat wan we i save jekem ol vas, from we oli no save tanem ol pej blong Baebol. Mi putum kot blong mi, mi stanap long platfom. Mi kolkol we mi kol. Mo taem mi stap toktok, mi luk win we i olsem smok i stap kamaot long maot blong mi. Be samting we i mekem mi sapraes, se mi no harem nating wan tok blong komplen. !Olgeta brata sista oli talem se oli glad mo i gud tumas we oli bin kam long miting! !Ol brata ya oli no gat tingting nating blong mestem miting ya!
3 ?Yumi Gat Filing Olsem Olgeta? ?Yumi rili laekem jans ya we yumi fri blong kam wanples long ol miting blong yumi evri wik? ?No yumi ting nating long ol miting taem i no gat problem long laef blong yumi? I no isi blong kam oltaem long ol miting mo samtaem sam bigfala samting oli save blokem yumi blong kam. Be yumi neva mas fogetem se long medel blong yumi i gat ol olfala, olgeta we oli gat bigfala problem long saed blong helt, ol handikap, olgeta we wok i tekem tumas taem long olgeta, mo sam narafala oli gat ol bigfala responsabiliti. Nating se i olsem, oli luk se i impoten tumas blong kam long ol miting, mo oltaem oli kam. !Olgeta oli rili soem sam nambawan eksampel we yumi save folem!—Skelem wetem Luk 2:37.
4 I gud se fasin blong go long olgeta Kristin miting, stat long wan smol buk stadi, go kasem ol bigfala asembli, i kam olsem wan kastom long yumi. ?From wanem i impoten tumas we yumi go long olgeta miting ya? From we God nao i givim oda ya long yumi. Be i gat sam narafala impoten risen tu. Yumi evriwan i nidim ol gudfala samting we oli kamaot long tijing blong God, mo help blong tabu speret we yumi kasem long ol miting. Bilif blong yumi i kam moa strong, taem yumi joen wanples wetem ol brata sista mo leftemap tingting blong yumi.—Hib. 10:24, 25.
5 Long taem we bodi blong Jisas i jenis, Pita i talem se: “Masta, i gud we mifala i stap long ples ya.” (Luk 9:33) I gud blong gat sem filing olsem, long saed blong olgeta Kristin miting blong yumi. !Tru ya, hemia rili wan nambawan samting blong go oltaem long ol miting!