Lafet Blong Tingbaot Ded Blong Kraes Long Fulwol
1 Jeova i givim fulap presen. Olgeta gudfala fasin blong hem wetem lav mo kaengud fasin we hem i soem, oli olsem “presen ya blong hem we i gud tumas, i bitim mak olgeta, yumi no save makem.” Yes, ‘gladhat blong Jeova’ i nambawan tumas, i bitim olgeta tok we yumi save talem.—2 Kor. 9:14, 15.
2 Presen We i Bigwan Moa: Beswan presen we Jeova i givim long yumi hemia Jisas Kraes, we i pemaot yumi. Jeova i givim wan pikinini ya nomo we hem i gat mo we hem i laekem tumas, blong soemaot bigfala lav blong hem long olgeta man long wol. (Jon 3:16) !I stret nomo we olgeta man long wol oli mekem lafet blong tingbaot nambawan blesing ya we God i givim wetem gladhat! ?Wetaem mo olsem wanem blong mekem lafet ya? Long naet blong Epril 1, 1999, olgeta Kristin raon long wol bambae oli mekem Lodsapa, hemia Memoriol blong sakrefaes ya we i impoten moa i winim ol narafala sakrefaes.—1 Kor. 11:20, 23-26.
3 Jisas Kraes i ded blong sevem yumi “long taem ya we yumi stap mekem i no gud yet.” Yumi save soemaot fasin tangkiu taem yumi mekem Memoriol blong ded blong hem mo taem yumi singaot ol narafala man blong joen wetem yumi long impoten lafet ya.—Rom. 5:8.
4 Wan Taem We i Impoten Tumas: Lafet ya blong ded blong Kraes i impoten from we hem i makem fasin blong Jisas we i stanap strong blong sapotem hae rul blong Jeova. Mo tu, samting ya i mekem yumi tingbaot se from bilif long ransom sakrefaes blong Kraes, yumi save kam klin long fored blong Jeova, nao yumi sua blong kasem laef. (Wok 4:12) !I tru, taem ya i impoten moa i bitim ol narafala taem blong yia!
5 Yumi save soemaot lav blong yumi taem yumi singaot ol man raonabaot long yumi, blong mekem Lodsapa wetem yumi. Plante milyan man oli save kasem ol blesing blong ransom sakrefaes taem oli lanem se ransom sakrefaes i sas tumas. (Fil. 3:8) Olgeta we oli bilif long sakrefaes blong Kraes oli save gat strong hop ya blong kasem laef we i no save finis.—Jon 17:3.
6 Taem blong Memoriol i givim jans long yumi blong soemaot fasin tangkiu long God from gladhat blong hem. Hemia wan nambawan taem tu blong joen fulwan long wok blong talemaot gud nius blong Kingdom blong God. Olgeta man we oli tingting gud long bigfala presen ya we Jeova i givim i fri, mo we oli mekem plan blong stap long Lodsapa blong yia ya, olgeta ya bambae oli kasem bigfala blesing.