Wok Blong Prij i Makem Yumi Se Yumi Defren
1 Plante man oli askem se, “?Olsem wanem ol Witnes blong Jeova oli defren long ol narafala skul?” ?Bambae yu yu ansa olsem wanem? Maet yu eksplenem sam bilif blong yumi we oli stanap long Baebol. Be, ?yu tingbaot finis blong tokbaot minista wok blong yumi olsem wan samting we i rili makemaot se yumi defren long ol narafala skul?—Mat. 24:14; 28:19, 20.
2 Tede, plante man we oli no go long skul, oli gat strong tingting blong serem bilif blong olgeta wetem ol narafala. Maet oli ting se sipos oli obei long ol loa blong gavman, gat ol gudfala fasin, mo mekem i gud long ol narafala, hemia i naf. Be oli no gat wan strong filing we i pusum olgeta blong halpem narafala blong lanem wanem we Baebol i talem long saed blong kasem laef. ?Olsem wanem yumi defren long olgeta ya?
3 Minista wok we yumi mekem wetem strong tingting mo gladhat, i defren olgeta long wok blong narafala skul. Blong bitim 100 yia, ol Witnes blong Jeova oli wok strong blong talemaot gud nius long evri ples long wol olsem we ol faswan Kristin oli bin mekem. Taem yumi mekem wok olsem, mak blong yumi hemia blong halpem plante man blong mekem laef blong olgeta i laenap wetem tingting blong God.—1 Tim. 2:4; 2 Pita 3:9.
4 ?Fasin Blong Yu i Soemaot Wanem? ?Ol narafala oli luksave se yu yu wok strong blong talemaot tok blong God? (Wok 17: 2, 3; 18:25) From hadwok blong yu blong prij, ?ol man raonabaot long yu oli luksave kwiktaem se skul blong yu i defren long skul blong olgeta? ?Ol man oli savegud yu se yu wan man we yu glad oltaem blong serem hop blong yu wetem ol narafala? ?Yu yu gat wan plan blong joen long minista wok evri wik? Tingbaot, yumi soem se yumi defren, i no jes from nem we yumi karem, be from wok we i joen wetem nem ya. Wok ya hem i blong tekem evri jans we yumi gat blong givim witnes long saed blong Jeova.—Aes. 43:10.
5 Lav we yumi gat long God mo ol narafala i pusum yumi blong joen long wok blong prij. (Mat. 22:37-39) Taswe yumi wantem yusum evri rod blong serem mesej blong Kingdom wetem ol narafala, olsem we Jisas mo ol aposol oli bin mekem bifo. I gud sipos yumi gohed blong wok wetem strong tingting blong talemaot gud nius long ol man we oli wantem lesin. Samting ya bambae i halpem olgeta we hat blong olgeta i stret, blong luksave ‘ol stret man we oli stap mekem wok blong God . . . mo ol man nogud, we oli no stap mekem wok blong hem.’—Mal. 3:18.