Faenem Glad Long Tabu Wok Blong God
1 Oli kambak we oli “glad tumas.” Stori blong Baebol i talem filing we ol 70 disaepol oli gat taem oli kambak long Jisas, afta long bigfala wok blong prij we oli mekem. Oli haremgud tumas long hat blong olgeta from we oli bin mekem wok blong God. (Luk 10:17) ?Wanem i save halpem yu blong gat semfala glad ya long ol tabu wok blong God?
2 Wan Positif Tingting: Yu gat nambawan jans ya we God i givim long yu blong mekem ol man oli kasem save long bigfala stamba tingting blong Jeova. Tru long wok blong prij, yu save givhan long wan man no wan woman blong i fri long ol nogud fasin blong wol ya mo ol jen blong giaman skul we i stap holemtaet hem. Yu save givim jans long ol man blong gat hop blong laef long wan wol we i no moa gat ol fasin seraot olsem we yumi luk raonabaot long yumi tede. Tingbaot glad we Jeova i gat taem hem i luk sid blong trutok we yu planem i gru gud long hat blong man we i lesin. Yu mas gat positif tingting mo prea long God blong i givim tabu spirit long yu blong yu soem frut blong glad taem yu gohed blong prij wetem fulhat blong yu.
3 Gudfala Trening: Taem we Jisas i spenem blong trenem ol 70 disaepol blong hem, i klosap sem mak long Miting blong Kingdom Wok we yumi stap mekem tede. Jisas i givim trening long olgeta blong oli naf blong karem gudfala frut long wok blong prij we oli mekem. (Luk 10:1-16) Tede, Miting blong Kingdom Wok i trenem yu long ol defren rod blong pulum intres blong man, statem storian wetem olgeta, mo statem mo mekem Baebol stadi wetem ol man. Taem yu folem ol advaes ya mo traehad blong kamgud moa long fasin blong yu blong prij, bambae yu sua moa long yu wan mo yu faenem glad, nao bambae yu no moa harem se yu fraet mo bambae yu no moa gat filing ya se yu no naf.
4 Putum Tingting i Stap Long Fiuja: Jisas i kasem glad long tabu wok we hem i mekem, nomata we hem i kasem ol hadtaem. ?From wanem i olsem? From we hem i putum tingting blong hem i stap strong long ol blesing mo ol gudfala samting we oli stap long fored blong hem. (Hib. 12:2) Yu save mekem sem mak sipos yu putum tingting mo hat blong yu i stap oltaem long nem blong Jeova mo long ol blesing we bambae oli kamtru long niufala wol blong God. Samting ya bambae i karem moa glad i kam long yu mo i mekem se minista wok blong yu i gat moa mining.
5 Tede, i no gat wan narafala blesing we i bigwan moa i winim jans ya we yu gat blong mekem tabu wok blong Jeova. Taswe, maet yu talem tok ya se: ‘God blong mi. Mi mi wantem tumas blong mekem ol samting we yu yu wantem.’—Sam 40:8.