‘Lego Laef Blong Yu’ Blong Halpem Ol Baebol Studen

1. ?Yumi mas mekem wanem blong halpem wan Baebol studen?

¹ Blong yu save givhan long wan Baebol studen blong i kasem mak ya we hem i givim laef blong hem long Jeova, yu mas mekem moa samting i bitim we yu stadi Baebol nomo wetem hem. Aposol Pol i tokbaot fasin fren blong hem wetem olgeta we hem i tijim olgeta se, i olsem wan mama we i stap lukaot long ol pikinini blong hem. Yumi tu yumi mas glad blong lego ‘laef blong yumi’ we i minim se yumi givim taem mo paoa blong yumi blong halpem ol studen blong yumi blong oli gat wan strong fasin fren wetem Jeova.—1 Tes. 2:7-9.

2. ?From wanem yumi mas soem intres long Baebol studen mo olsem wanem blong mekem olsem?

² Soem Intres Long Hem: Taem wan Baebol studen i mekem wanem we hem i lanem i wok long laef blong hem, voes blong hat blong hem bambae i pulum hem blong no moa joen wetem ol fren blong hem we oli no folem ol rul blong Baebol long laef blong olgeta. (1 Pita 4:4) Maet famle blong hem i agensem hem. (Mat. 10:34-36) Ol samting ya oli save mekem we hem i harem nogud. Ale yumi save halpem hem taem yumi soem intres long hem. Wan misinari we i mekem wok ya plante yia finis i talem se: “Afta we stadi i finis, no hareap blong ronwe long hem. Sipos i nidim, stap smoltaem mo storian wetem hem.” Yu mas rere blong givhan long laef blong hem. Maet yu save telefon no visitim hem taem hem i sik. Yu save sidaon wetem hem long taem blong ol miting mo sipos hem i gat ol pikinini, givhan long hem blong lukaot long ol pikinini blong hem.

3. ?Olsem wanem yumi save halpem ol Baebol studen blong yumi blong oli kasem glad ya we i kam long kongregesen?

³ Kongregesen i Givhan: Sipos yu prij long teritori we i klosap long haos blong studen blong yu, yu save go visitim hem smoltaem blong hem i save mitim narafala witnes we i wok wetem yu. Sipos i stret, wanwan taem yu save tekem ol defdefren brata sista mo elda, i kam joen wetem yu long stadi. Mo tu, afta we yu statem wan niufala Baebol stadi wetem wan man, yu no mas tektaem tumas blong singaot hem blong i kam long ol miting long Haos Kingdom. Olsem nao, bambae hem i harem gud long gudfala kampani blong ol memba blong kongregesen we maet oli kam olsem famle blong hem long saed blong wosip.—Mak 10:29, 30; Hib. 10:24, 25.

4. ?Wanem frut i kamaot from hadwok blong yumi?

⁴ Ol papa mama we oli traehad blong givhan long ol pikinini blong olgeta long saed blong wosip, oli glad tumas taem ol pikinini ya oli tekem saed blong Jeova mo oli stap long trutok. (3 Jon 4) Yumi save kasem semfala glad ya taem yumi rere blong lego laef blong yumi blong halpem ol Baebol studen blong yumi.