Bigfala Fasin We Wan Gudfala Tija i Mas Gat
1. ?Wanem bigfala fasin blong wan gudfala tija?
1 ?Wanem bigfala fasin we i mekem se wan man i kam wan gudfala tija blong Baebol? ?Hem i skul gud? ?Hem i stap plante yia long trutok? ?Hem i gat gudhan blong tij? Bigfala fasin ya, hem i sem fasin we i kavremap olgeta samting we Loa i talem, hem i sem fasin we i makemaot ol man blong Jisas, mo hem i wan long ol fofala stamba fasin blong Jehova we i hae moa long ol narafala fasin blong hem. (Jon 13:35; Gal. 5:14; 1 Jon 4:8) Bigfala fasin ya hem i lav. Ol gudfala tija oli soemaot se oli lavem ol man.
2. ?From wanem i impoten tumas we yumi lavem ol man?
2 Hem i Lavem Ol Man: Bigfala Tija ya Jisas, i soemaot long ol man se hem i lavem olgeta, mo samting ya i pulum olgeta blong oli lesin long hem. (Luk 5:12, 13; Jon 13:1; 15:13) Sipos yumi lavem ol man, bambae yumi tekem evri janis blong prij long olgeta. Sipos ol man oli mekem i strong tumas long yumi mo oli no wantem lesin long yumi, samting ya bambae i no save blokem yumi. Bambae yumi soemaot long man we yumi prij long hem se yumi tingbaot hem, mo bambae yumi mekem se tok blong yumi i joen wetem samting we hem i stap wari long hem. Bambae yumi glad blong yusum taem blong yumi blong mekem ol Baebol stadi wanwan, be i no hemia nomo. Bifo we yumi go mekem stadi, yumi glad tu blong yusum taem blong yumi blong rerem stadi blong olgeta wanwan.
3. Taem yumi lavem trutok blong Baebol, ?samting ya i save givhan long yumi olsem wanem long wok blong prij?
3 Hem i Lavem Trutok Blong Baebol: Jisas i lavem trutok blong Baebol tu, mo hem i tinghae long hem olsem wan sas samting. (Mat. 13:52) Sipos yumi lavem trutok, bambae yumi glad blong tokbaot trutok ya, mo samting ya i save pulum ol man blong oli lesin long yumi. Lav bambae i givhan long yumi blong yumi putum tingting i stap nomo long ol nambawan save we yumi stap talemaot. Bambae yumi no tingting tumas long ol samting we yumi no naf blong mekem. Nao bambae yumi no fraet blong toktok long ol man.
4. ?Yumi mas mekem wanem blong yumi save lavem ol man?
4 Yumi Mas Traehad Blong Lavem Ol Man: ?Yumi mas mekem wanem blong yumi save lavem ol man? Yumi mas tingting gud long lav we Jehova mo Pikinini blong hem tufala i soemaot finis. Mo yumi mas tingbaot se ol man long ples blong yumi oli nidim trutok. (Mak 6:34; 1 Jon 4:10, 11) Sipos yumi stadi mo tingting dip oltaem, bambae yumi lavem moa ol trutok blong Baebol. Lav i wan long ol fasin we oli olsem frut blong tabu spirit. (Gal. 5:22) Taswe, yumi save prea long Jehova blong hem i givim tabu spirit long yumi, mo yumi save askem long hem blong i givhan long yumi blong kam strong moa blong lavem ol man. (Luk 11:13; 1 Jon 5:14) Nomata se yumi skul gud no nogat, yumi stap plante yia long trutok no nogat, mo yumi gat gudhan blong tij no nogat, be yumi save karem moa frut long wok blong tij sipos yumi lavem ol man.